«Ուրարտուն» հաղթեց «Արարատին» և վերադարձավ ՀՊԼ-ի լավագույն եռյակ

«Ուրարտուն» կարևոր, բայց շատ դժվար հաղթանակ տարավ Հայաստանի Պրեմիեր լիգայի 25-րդ տուրում։ Թիմը նվազագույն հաշվով՝ 1:0, հաղթեց «Արարատին» և կրկին բարձրացավ առաջնության լավագույն եռյակ։

Խաղի միակ գոլը խփեց Խարիտոն Այվազյանը։ Գոլային փոխանցման հեղինակ դարձավ «Ուրարտուի» ավագ Ժիրայր Մարգարյանը։ Պաշտպանի համար սա արդեն ութերորդ ասիստն է ՀՊԼ-ի ընթացիկ մրցաշրջանում։ Այս ցուցանիշով նա առաջ է Արթուր Շաղոյանից և Օլավալե Ֆարայոլայից՝ առաջնության լավագույն ասիստենտների պայքարում։

Այս հաղթանակը մեծ նշանակություն ունի «Ուրարտուի» համար եվրագավաթային տեղերի համար պայքարում։ Թիմը վերադարձավ մրցաշարային աղյուսակի լավագույն եռյակ և ամրապնդեց իր դիրքերը մրցաշրջանի վճռորոշ հատվածում, որտեղ առաջատարների միջև պայքարը շարունակում է շատ խիտ մնալ։

Միևնույն ժամանակ, հանդիպումը հաղթողների համար ամենևին էլ հեշտ չստացվեց։ «Արարատը», որը շարունակում է եզրափակել մրցաշարային աղյուսակը, մոտ էր միավոր վաստակելուն։ Երկրորդ խաղակեսի սկզբում թիմը գոլ խփեց, սակայն այն չարձանագրվեց։ Իսկ հանդիպման վերջնամասում «Արարատն» ունեցավ մի քանի վտանգավոր պահ, սակայն տանտերերը չկարողացան օգտագործել իրենց հնարավորությունները։

Արդյունքում «Ուրարտուն» պահեց նվազագույն առավելությունը և հասավ չափազանց կարևոր հաղթանակի, իսկ «Արարատը» կրկին մնաց առանց միավորի՝ չնայած արժանի խաղին և մրցակցի դարպասի մոտ ստեղծած մեծ թվով պահերին։