Արոնյանը՝ երրորդ, Մարտիրոսյանը՝ 13-րդ․ Total Chess-ի մեկնարկային կայծակնային մրցաշարի արդյունքները
- Հեղինակ: Vahe Hakobyan
- Sportaran
Լևոն Արոնյանը զբաղեցրել է երրորդ տեղը, իսկ Հայկ Մարտիրոսյանը՝ 13-րդը Total Chess World Championship Tour Pilot-ի նախնական կայծակնային մրցաշարում, որն ավարտվել է նոյեմբերի 10-ին Բուդապեշտում։ Մրցմանը մասնակցել է 24 շախմատիստ։
ԱՄՆ-ը ներկայացնող Արոնյանը վաստակել է 6 միավոր՝ 9 հնարավորից՝ տոնելով չորս հաղթանակ, չորս պարտիա ավարտելով ոչ-ոքի և կրելով մեկ պարտություն։ Վերջին տուրում նա հաղթել է հնդիկ գրոսմայստեր Արջուն Էրիգայսիին և ապահովել տեղը լավագույն եռյակում։
Հաղթող է դարձել Մագնուս Կարլսենը՝ 7 միավորով։ Նորվեգացին մրցաշարն ավարտել է առանց պարտության, իսկ վերջին պարտիայում սևերով հաղթել է Մարտիրոսյանին։ Երկրորդ տեղը զբաղեցրել է ֆրանսիացի Մաքսիմ Վաշիե-Լագրավը՝ 6,5 միավորով։
Մարտիրոսյանը մրցաշարն ավարտել է 4,5 միավորով՝ չորս հաղթանակ, մեկ ոչ-ոքի և չորս պարտություն։ Հայ գրոսմայստերը հաղթել է Աբհիմանյու Միշրային, Շահրիյար Մամեդյարովին, Յորդեն վան Ֆորեստին և Վայշալի Ռամեշբաբուին։ Միակ ոչ-ոքին նա գրանցել է մեկնարկային տուրում՝ Նոդիրբեկ Աբդուսատորովի հետ պարտիայում։
Հայկ Մարտիրոսյանի բոլոր արդյունքները
| Տուր | Սպիտակներ | Հաշիվ | Սևեր |
|---|---|---|---|
| 1 | Նոդիրբեկ Աբդուսատորով | ½:½ | Հայկ Մարտիրոսյան |
| 2 | Հայկ Մարտիրոսյան | 1:0 | Աբհիմանյու Միշրա |
| 3 | Հայկ Մարտիրոսյան | 0:1 | Յան Նեպոմնյաշչի |
| 4 | Ֆաբիանո Կարուանա | 1:0 | Հայկ Մարտիրոսյան |
| 5 | Հայկ Մարտիրոսյան | 1:0 | Շահրիյար Մամեդյարով |
| 6 | Յորդեն վան Ֆորեստ | 0:1 | Հայկ Մարտիրոսյան |
| 7 | Հայկ Մարտիրոսյան | 0:1 | Ալիռեզա Ֆիրուջա |
| 8 | Վայշալի Ռամեշբաբու | 0:1 | Հայկ Մարտիրոսյան |
| 9 | Հայկ Մարտիրոսյան | 0:1 | Մագնուս Կարլսեն |
Լրացուցիչ ցուցանիշներով Մարտիրոսյանը եզրափակիչ աղյուսակում զբաղեցրել է 13-րդ տեղը։
Կայծակնային մրցաշարն անցկացվել է շվեյցարական մրցակարգով՝ ինը տուրով։ Ժամանակի վերահսկողությունը եղել է երեք րոպե՝ յուրաքանչյուր քայլի համար երկու վայրկյան հավելումով։ Վերջնական դասակարգումը կօգտագործվի խմբային փուլում միավորների հավասարության դեպքում, փլեյ-օֆֆի մրցաշարային ցանցերում կիսաեզրափակիչ զույգերը որոշելիս, ինչպես նաև յուրաքանչյուր նոկաուտ դիմակայության առաջին կայծակնային պարտիայում խաղաքարերի գույնն ընտրելիս։
Խմբային փուլը կմեկնարկի նոյեմբերի 11-ին։ Մարտիրոսյանը C խմբում կմրցի Կարլսենի, Անիշ Գիրիի, Յան Նեպոմնյաշչու, Աբհիմանյու Միշրայի և Շահրիյար Մամեդյարովի հետ։ Մասնակիցները կանցկացնեն երկշրջան մրցաշար՝ Fast Classic ձևաչափով, 45 րոպե՝ յուրաքանչյուր քայլի համար 30 վայրկյան հավելումով ժամանակի վերահսկողությամբ։ Հաղթանակի համար տրվում է երեք միավոր, ոչ-ոքիի համար՝ մեկ։
Քննարկեք նորությունները!
Անցնել մեկնաբանություններին ↓
Comments
0