Հայկ Մարտիրոսյանը Կարլսենի հետ նույն խմբում կխաղա Բուդապեշտի Total Chess մրցաշարում

Հայաստանի շախմատի հավաքականի առաջատար Հայկ Մարտիրոսյանը կմասնակցի Total Chess World Championship Tour Pilot առաջին մրցաշարին, որը կանցկացվի Բուդապեշտում՝ նոյեմբերի 10–20-ը։ Հայ գրոսմայստերն ընդգրկվել է C խմբում, որտեղ նրա մրցակիցներից մեկը կլինի Մագնուս Կարլսենը։

Norway Chess-ի մշակած և ՖԻԴԵ-ի հավանությանն արժանացած մրցաշարին կմասնակցեն 24 շախմատիստներ։ Նրանք կփորձարկեն նոր ձևաչափ, որը միավորում է երեք մրցաձև՝ Fast Classic՝ արագացված դասական շախմատ, արագ շախմատ և կայծակնային շախմատ։ Հունգարիայի մայրաքաղաքում կայանալիք մրցաշարը փորձնական փուլ կլինի 2027 թվականին լիարժեք մրցաշարային շարքի մեկնարկից առաջ։

Մարտիրոսյանից և Կարլսենից բացի, C խմբում հանդես կգան Անիշ Գիրին, Յան Նեպոմնյաշչին, Շահրիյար Մամեդյարովը և Աբհիմանյու Միշրան։ Խմբային փուլը կանցկացվի նոյեմբերի 11–15-ը․ յուրաքանչյուր մասնակից մյուս մրցակիցներից յուրաքանչյուրի հետ կխաղա երկու պարտիա՝ 45 րոպե և յուրաքանչյուր քայլին 30 վայրկյան հավելումով ժամանակակարգով։ Հաղթանակի համար կտրվի երեք միավոր, ոչ-ոքիի համար՝ մեկ։

Խմբային փուլում հայ շախմատիստի առաջին մրցակիցը կլինի Շահրիյար Մամեդյարովը․ նրանց երկու պարտիաները նախատեսված են նոյեմբերի 11-ին։ Մարտիրոսյանի և Կարլսենի հանդիպումները կկայանան նոյեմբերի 13-ին։

Սակայն մրցաշարը կմեկնարկի նոյեմբերի 10-ին՝ առանձին Blitz Swiss մրցումով։ Բոլոր 24 մասնակիցները շվեյցարական մրցակարգով կանցկացնեն ինը տուր՝ երեք րոպե և յուրաքանչյուր քայլին երկու վայրկյան հավելումով ժամանակակարգով։ Մեկնարկային պարտիայում Մարտիրոսյանը սև խաղաքարերով կհանդիպի Ուզբեկստանի ներկայացուցիչ Նոդիրբեկ Աբդուսատորովին։ Կայծակնային մրցաշարի վերջնական դասակարգումը կօգտագործվի խմբերում միավորների հավասարության դեպքում, ինչպես նաև փլեյ-օֆֆի կիսաեզրափակիչների զույգերը որոշելու համար։

Գլխավոր մրցանակի համար պայքարը կշարունակեն չորս խմբերի հաղթողները։ Մյուս շախմատիստները ևս կմնան մրցաշարում և փլեյ-օֆֆի առանձին ցանցերում կվիճարկեն 5–24-րդ տեղերը։

Ընդհանուր մրցանակային հիմնադրամը կազմում է 650 հազար դոլար։ Հաղթողը կստանա 80 հազար, իսկ վերջին տեղը զբաղեցրած մասնակիցը՝ 10 հազար դոլար։