Մարտուն Մեժլումյանը կմենամարտի UAE Warriors-ի չեմպիոնական տիտղոսի համար

Հայ մարտիկ Մարտուն Մեժլումյանը (15-3) կանցկացնի մենամարտ UAE Warriors կազմակերպության թեթև քաշային կարգի թափուր չեմպիոնական տիտղոսի համար։

Մեժլումյանի մրցակիցը կլինի Ուկրաինայի անպարտելի ներկայացուցիչ Վլադիսլավ Ռուդնևը։ Հայ մարտիկի հաշվին կա 15 հաղթանակ և 3 պարտություն, մինչդեռ Ռուդնևը մենամարտին մոտենում է կատարյալ ռեկորդով՝ 12-0։

Մեժլումյանի համար սա կլինի էմիրաթական պրոմոուշենի գոտին նվաճելու երկրորդ փորձը։ 2023 թվականին նա արդեն պետք է անցկացներ տիտղոսային մենամարտ Բրունո Ասևեդոյի դեմ, սակայն վնասվածքի պատճառով ստիպված էր հրաժարվել մենամարտից։

Մեժլումյան-Ռուդնև մենամարտը կգլխավորի UAE Warriors 71 մրցաշարը, որը կկայանա մայիսի 9-ին Աբու Դաբիում։

Այս իրադարձության շրջանակում հանդես կգա նաև ևս մեկ հայ մարտիկ՝ Սերգո Ալեքսանյանը։ Նա կմենամարտի Կամերունի ներկայացուցիչ Հաուրես Դեայի դեմ։ Ալեքսանյանի ռեկորդը 5-1 է, իսկ նրա մրցակցինը՝ 12-7։