Մարկո Առնաուտովիչը կարիերան կշարունակի «Ցրվենա Զվեզդայում»․ այժմ նա Նաիր Տիկնիզյանի ակումբակիցն է։

Հայտնի ավստրիացի հարձակվող Մարկո Առնաուտովիչը պաշտոնապես պայմանագիր է ստորագրել Բելգրադի «Ցրվենա Զվեզդայի» հետ, տեղեկացնում է սերբական ակումբի մամուլի ծառայությունը։ 36-ամյա ֆուտբոլիստը միացել է թիմին ազատ գործակալի կարգավիճակով՝ միլանյան «Ինտերի» հետ պայմանագրի ավարտից հետո։

Այսպիսով, Առնաուտովիչը դարձավ Հայաստանի ազգային հավաքականի պաշտպան Նաիր Տիկնիզյանի ակումբակիցը։ Նախկինում նա խաղացել է մեկ այլ հայի՝ Հենրիխ Մխիթարյանի հետ միասին «Ինտերում»։ Առանց հայերի՝ ոչ մի տեղ։

Անցած մրցաշրջանում «Ինտերի» կազմում Առնաուտովիչը անցկացրել է 28 հանդիպում՝ խփելով 7 գոլ և կատարելով 2 գոլային փոխանցում։

Իր հարուստ կարիերայի ընթացքում փորձառու հարձակվողը հանդես է եկել մի շարք ակումբներում՝ «Բոլոնիա», «Վեստ Հեմ», «Սթոք Սիթի», «Վերդեր», «Տվենտե», ինչպես նաև Ավստրիայի հավաքականում, որտեղ երկար տարիներ եղել է հիմնական խաղացողներից մեկը։

Հնարավոր է, որ «Ցրվենա Զվեզդա» տեղափոխությունը դառնա վերջին էջը նախորդ տասնամյակի ամենախարիզմատիկ հարձակվողներից մեկի կարիերայում։