Էդուարդ Սպերցյանը տեղափոխվում է «Ալ-Ահլի». «Կրասնոդարի» հետ գործարքն ավարտված է
- Հեղինակ: Vahe Hakobyan
- Sportaran
Հայաստանի ազգային հավաքականի ավագ և «Կրասնոդարի» կիսապաշտպան Էդուարդ Սպերցյանը մոտ է սաուդյան «Ալ-Ահլի» տեղափոխվելուն։ Գործարքը փաստացի արդեն ավարտված է, մնացել են միայն ձևականությունները։
Սաուդցի լրագրող և «Ալ-Ահլի» ակումբի Գլխավոր ասամբլեայի պատվավոր անդամ Ռամզի Ալսուլամիի տեղեկություններով՝ սաուդյան ակումբն ու «Կրասնոդարը» լիարժեք համաձայնության են հասել 26-ամյա ֆուտբոլիստի տրանսֆերի շուրջ։
Գործարքի գումարը կկազմի 25 միլիոն դոլար։ Նշվում է, որ Սպերցյանի տեղափոխությունը համաձայնեցվել է «Ալ-Ահլիի» մարզական տնօրեն Ռույ Պեդրու Բրազի առաջարկությամբ։
Հայ կիսապաշտպանի բուժզննումը նշանակված է առաջիկա օրերին։ Դրանից հետո տրանսֆերը պետք է վերջնականապես ձևակերպվի։
Սպերցյանը «Կրասնոդարի» սան է և վերջին տարիներին ակումբի առաջատարներից մեկը։ Ռուսական թիմի կազմում նա դարձել է ՌՊԼ-ի չեմպիոն և եղել լիգայի ամենաարդյունավետ կիսապաշտպաններից մեկը։
Հայաստանի հավաքականի համար այս տեղափոխությունը կդառնա վերջին տարիների ամենահնչեղ տրանսֆերներից մեկը։ «Ալ-Ահլիում» Սպերցյանը կարող է կարիերան շարունակել Սաուդյան Արաբիայի առաջնությունում, որտեղ արդեն հանդես են գալիս եվրոպական մակարդակի բազմաթիվ հայտնի ֆուտբոլիստներ։
Սպերցյանը թիմակից կդառնա այնպիսի ֆուտբոլիստների, ինչպիսիք են Այվան Թոունին, Էնցո Միյոն, Էդուարդ Մենդին, Գալենոն և Ֆրանկ Կեսյեն։ Իսկ Ռիյադ Մահրեզը պետք է հեռանա թիմից։