Վարդան Մինասյանը գլխավորել է լիբանանյան «Նեջմեն»

Հայաստանի հավաքականի նախկին գլխավոր մարզիչ Վարդան Մինասյանը նշանակվել է Բեյրութի «Նեջմեի» գլխավոր մարզիչ։ 52-ամյա մասնագետի հետ համագործակցության մասին պաշտոնապես հայտարարել է լիբանանյան ակումբը։

Այս պաշտոնում Մինասյանը փոխարինել է թունիսցի մարզիչ Լասաադ Դրիդիին, որը ընտանեկան հանգամանքների պատճառով հեռացել է թիմից։ Հայ մասնագետի հետ պայմանագրի ժամկետը չի հրապարակվում։

Մինասյանի գլխավորած վերջին ակումբը եղել է «Արարատ-Արմենիան», որը նա լքել է 2025 թվականի մայիսին։ Հայաստանի հավաքականը մասնագետը գլխավորել է 2009–2013 թվականներին, իսկ 2018-ին վերադարձել է ազգային թիմի ղեկին։ Նրա գլխավորությամբ Հայաստանի հավաքականը Եվրո-2012-ի ընտրական փուլում իր խմբում զբաղեցրել է երրորդ տեղը։

Ներկայացնելով նոր գլխավոր մարզչին՝ «Նեջմեն» ընդգծել է նրա UEFA Pro մարզչական արտոնագիրն ու ակումբային մակարդակում գրանցած նվաճումները։ Մինասյանը հինգ անգամ դարձել է Հայաստանի չեմպիոն՝ երեք անգամ «Փյունիկի» և երկու անգամ «Արարատ-Արմենիայի» հետ։ 2019 թվականին նա նաև «Արարատ-Արմենիային» դուրս է բերել Եվրոպա լիգայի որակավորման փլեյ-օֆֆ փուլ։

Մինասյանը թիմը գլխավորում է նոր մրցաշրջանի մեկնարկում։ Լիբանանի առաջնության երկու տուրերից հետո «Նեջմեն» վաստակել է չորս միավոր։ Նախորդ մրցաշրջանում Բեյրութը ներկայացնող ակումբն առաջնությունն ավարտել է երկրորդ տեղում։ Թիմը մասնակցել է նաև ԱՖԿ-ի Չելենջ լիգային, սակայն չի կարողացել հաղթահարել խմբային փուլը։