Ծառուկյանը կօգնի Չիմաևին Ստրիքլենդի դեմ մենամարտին պատրաստվելիս

UFC-ի միջին քաշային կարգի չեմպիոն Խամզաթ Չիմաևը պատմել է, թե ով կլինի իր կողքին Շոն Ստրիքլենդի դեմ տիտղոսի առաջիկա պաշտպանության ժամանակ։ Մարտիկի խոսքով՝ նրա անկյունում կհայտնվի թեթև քաշային կարգի ամենաուժեղ ներկայացուցիչներից մեկը՝ Արման Ծառուկյանը։

Չիմաևը նշել է, որ Ծառուկյանը ոչ միայն օգնում է իրեն պահպանել տրամադրվածությունը կարևոր մենամարտերից առաջ, այլև կարողանում է լիցքաթափել մթնոլորտը։ Խամզաթը խոստովանել է, որ հայ մարտիկը հաճախ բարձրացնում է իր տրամադրությունը կատակներով, այդ թվում՝ բուրգերների և այլ զվարճալի թեմաների մասին խոսակցություններով։

«Արման Ծառուկյանը կլինի իմ վայրկյանորդը։ Նա միշտ ասում է, որ մենք պետք է բուրգերներ ուտենք և նման բաներ։ Նա ինձ երջանիկ է դարձնում», - գրել է Չիմաևը։

Չիմաևի և Ստրիքլենդի միջև տիտղոսային մենամարտը նախատեսված է մայիսի 10-ին։ Մենամարտը պետք է կայանա UFC 328 մրցաշարում՝ ԱՄՆ Նյու Ջերսի նահանգի Նյուարկ քաղաքում։

Չիմաևի համար սա կլինի միջին քաշային կարգում չեմպիոնական գոտու հերթական պաշտպանությունը։ Նա շարունակում է մնալ անպարտելի պրոֆեսիոնալ կարիերայում․ նրա հաշվին կա 15 հաղթանակ և ոչ մի պարտություն։ Ընդ որում, Խամզաթը 12 մենամարտ ավարտել է վաղաժամ։