Արթուր Ղարիբյանը խփեց առաջին գոլը «Ռոդինայի» կազմում և օգնեց թիմին դուրս գալ ՌՊԼ (ՏԵՍԱՆՅՈՒԹ)

Հայաստանի երիտասարդական հավաքականի հարձակվող Արթուր Ղարիբյանը խփեց իր առաջին գոլը «Ռոդինայի» կազմում PARI լիգայի 33-րդ տուրի՝ «Չելյաբինսկի» դեմ խաղում։

Ղարիբյանը հանդիպումը սկսեց պահեստայինների նստարանից և խաղադաշտ դուրս եկավ 83-րդ րոպեին։ Արդեն 89-րդ րոպեին հայ հարձակվողը հայտնվեց ճիշտ դիրքում և խփեց իր թիմի երկրորդ գոլը՝ ձևակերպելով վերջնական հաշիվը՝ 2:0։

Ղարիբյանի համար սա մրցաշրջանի վեցերորդ գոլն էր։ Ավելի վաղ նա գոլեր էր խփել Կոստրոմայի «Սպարտակի» կազմում, իսկ այժմ առաջին անգամ աչքի ընկավ «Ռոդինայի» մարզաշապիկով։

ՏԵՍԱՆՅՈՒԹ․

«Չելյաբինսկի» նկատմամբ հաղթանակը պատմական դարձավ մոսկովյան թիմի համար։ «Ռոդինան» իր պատմության մեջ առաջին անգամ ապահովեց ուղիղ ելքը Ռուսաստանի Պրեմիեր լիգա և հաջորդ մրցաշրջանում հանդես կգա բարձրագույն դիվիզիոնում։

Խաղի առաջին գոլը գրանցվեց 25-րդ րոպեին։ «Չելյաբինսկի» դարպասապահը կորցրեց դիրքը դարպասում, Արտյոմ Մաքսիմենկոն արագ օգտվեց իրավիճակից և փոխանցում կատարեց Իվան Տիմոշենկոյին, որը դիպուկ հարվածով գրավեց դարպասը։

Դրանից հետո հանդիպումն անցավ առանց մեծ քանակի վտանգավոր պահերի, սակայն վերջնամասում «Ռոդինան» կարողացավ ամրապնդել առավելությունը։ Ղարիբյանը սառնասրտորեն օգտագործեց իր հնարավորությունը և թիմի հաղթանակը դարձրեց ավելի վստահ։

Սակայն գոլից ընդամենը մեկ րոպե անց հայ հարձակվողը կարմիր քարտ ստացավ ծեծկռտուքի մասնակցելու համար։ Հեռացման պատճառով նա բաց կթողնի վերջին տուրի հանդիպումը։

Նշենք, որ «Ռոդինայի» կազմում հանդես է գալիս նաև հայ ֆուտբոլիստ Արշակ Կորյանը, սակայն այս հանդիպմանը նա մասնակցություն չունեցավ։

33-րդ տուրից հետո PARI լիգայի երկու առաջատարները՝ «Ֆակելը» և «Ռոդինան», ապահովեցին իրենց ելքը Պրեմիեր լիգա։ «Ռոդինայի» համար սա ակումբի պատմության մեջ առաջին ելքն է բարձրագույն դիվիզիոն։