Արման Ծառուկյանը կդառնա Սպիտակ տանը կայանալիք UFC-ի գլխավոր մենամարտի պահեստային մարտիկը

Արման Ծառուկյանը պաշտոնապես կարևոր դեր է ստացել UFC-ի՝ Սպիտակ տանը կայանալիք պատմական մրցաշարում։ Հայ մարտիկը կլինի երեկոյի գլխավոր մենամարտի պահեստային մասնակիցը, որում պետք է հանդիպեն Իլիա Տոպուրիան և Ջասթին Գեյջին։

Այս մասին ավելի վաղ հայտնել էր UFC-ի ղեկավար Դանա Ուայթը, իսկ այժմ տեղեկությունը հաստատվել է նաև կազմակերպության պաշտոնական էջերով։ Եթե Տոպուրիան կամ Գեյջին վնասվածքի կամ այլ պատճառներով չկարողանան մասնակցել մենամարտին, նրանց տեղը կզբաղեցնի Ծառուկյանը։

Սպիտակ տանը կայանալիք UFC մրցաշարի գլխավոր մենամարտը պետք է անցկացվի թեթև քաշային կարգում։ Ծառուկյանի համար պահեստային մարտիկի կարգավիճակը կարող է դառնալ տիտղոսային պայքարին վերադառնալու հնարավորություն և որոշակի հանգամանքների դեպքում անմիջապես ստանալ կարիերայի ամենահնչեղ մենամարտերից մեկը։

Դանա Ուայթը, խոսելով Արմանի հաջորդ մենամարտի մասին, հաստատել է, որ UFC-ն նրան դիտարկում է որպես գլխավոր իրադարձության պահեստային մասնակից։

«Հարցնում եք Արմանի հաջորդ մենամարտի մասի՞ն։ Արմանը Սպիտակ տանը կայանալիք մրցաշարի պահեստային մարտիկն է։ Այնպես որ, եթե ինչ-որ բան պատահի, հենց նա դուրս կգա այդ մենամարտին։ Արմանը այնտեղ կլինի։ Նա լավ է մարքեթինգի հարցում, դուք գիտեք։ Նրա անցած ուղին և այն ամենը, ինչի միջով նա անցել է, իսկապես տպավորիչ են։ Պետք է դուրս գալ այնտեղ և ստիպել մարդկանց ցանկանալ տեսնել դա», — հայտարարել է Դանա Ուայթը։

Ծառուկյանը շարունակում է մնալ UFC-ի թեթև քաշային կարգի գլխավոր հավակնորդներից մեկը։ Նրա հնարավոր մասնակցությունը Սպիտակ տանը կայանալիք մրցաշարին հավելյալ ինտրիգ է հաղորդում գլխավոր իրադարձությանը, քանի որ հայ մարտիկն արդեն երկար ժամանակ հավակնում է չեմպիոնական շանսի։

UFC-ի՝ Սպիտակ տանը կայանալիք մրցաշարը նախատեսված է հունիսի 14-ին, իսկ գլխավոր իրադարձությունը պետք է լինի Իլիա Տոպուրիայի և Ջասթին Գեյջիի մենամարտը։