Արայիկ Հարությունյանը՝ Հայաստանի ծանրամարտի ֆեդերացիայի նոր նախագահ
ՀՀ վարչապետի աշխատակազմի ղեկավար Արայիկ Հարությունյանը Հայաստանի ծանրամարտի ֆեդերացիայի նախագահի ընտրություններում միակ թեկնածուն էր: Նա ընտրվել է այդ պաշտոնում 4 տարի ժամկետով:
Նախկինում ֆեդերացիայի նախագահը եղել է Հրաչյա Ռոստոմյանը:
Միջազգային ծանրամարտի ֆեդերացիայի նախագահ Մոհամեդ Ջալուդը մասնակցել է Հայաստանի ծանրամարտի ֆեդերացիայի նիստին, որի ընթացքում ՀՀ վարչապետի աշխատակազմի ղեկավար Արայիկ Հարությունյանը ընտրվել է Հայաստանի ծանրամարտի ֆեդերացիայի նախագահ:
«Ծանրամարտն ունի Հայաստանում երկարամյա ավանդույթներ։ 2008 թվականին Պեկինի Օլիմպիական խաղերից սկսած Հայաստանը միշտ նվաճել է օլիմպիական մեդալներ։ Եվ այս ամենը ցույց է տալիս, որ ծանրամարտն ունի կարևոր տեղ Հայաստանում։ Մեզ համար հպարտության առարկա է, որ ծանրամարտը Հայաստանում զբաղեցնում է առաջատար դիրք», — նշել է Ջալուդը ֆեդերացիայի հերթական նիստի ընթացքում, հաղորդում է «Արմենպրես»-ը։