Աղասի Աղասյանը հետմահու արժանացել է 2014 թվականի Եվրոպայի առաջնության բրոնզե մեդալների

Հայաստանի ծանրամարտի ազգային հավաքականի նախկին անդամ, բազմակի Հայաստանի չեմպիոն Աղասի Աղասյանը հետմահու արժանացել է 2014 թվականի Եվրոպայի առաջնության բրոնզե մեդալներին, որը կայացել է Թել Ավիվում։

Պարգևների վերաբաշխման որոշումը կայացվել է այն բանից հետո, երբ 2019 թվականին Եվրոպական ծանրամարտի ֆեդերացիան (EWF) մի շարք մարզիկների որակազրկել է հակադոպինգային կանոնների խախտման համար։ Մրցումների արդյունքների վերանայման արդյունքում մինչև 85 կգ քաշային կարգում Աղասյանը ճանաչվել է բրոնզե մեդալակիր թե՛ «հրում» վարժությունում, թե՛ երկամարտի ընդհանուր արդյունքով։

Մեդալի հանձնման արարողությունը տեղի է ունեցել Եվրոպական ծանրամարտի ֆեդերացիայի կոնգրեսի շրջանակում Բաթումում (Վրաստան)։ Պարգևը ստացել է Հայաստանի ծանրամարտի ֆեդերացիայի գլխավոր քարտուղար Սամվել Գասպարյանը։ Մոտ օրերին մեդալը կհանձնվի մարզիկի ընտանիքին։

2014 թվականի Եվրոպայի առաջնությունում Աղասյանը երկամարտում 345 կգ արդյունքով զբաղեցրել էր չորրորդ տեղը։ Այն ժամանակ երրորդ տեղը զբաղեցրել էր Ռուսաստանի ներկայացուցիչ Ադամ Մալիգովը (367 կգ), սակայն հետագայում նա զրկվել է մեդալից դոպինգի պատճառով, և բրոնզե մեդալը փոխանցվել է հայ մարզիկին։

Աղասի Աղասյանը ողբերգականորեն մահացել է 2019 թվականին՝ 30 տարեկան հասակում, ճանապարհատրանսպորտային պատահարի հետևանքով։

Նշենք, որ արդեն ապրիլի 19-ին Բաթումում կմեկնարկի 2026 թվականի ծանրամարտի Եվրոպայի առաջնությունը։