13-ամյա հայ շախմատիստ Սերգեյ Սկլոկին-Բաղիյանը տպավորիչ ելույթ ունեցավ Դվորկովիչի հուշամրցաշարում
- Հեղինակ: Vahe Hakobyan
- Sportaran
13-ամյա հայ շախմատիստ Սերգեյ Սկլոկին-Բաղիյանը փայլուն ելույթ է ունեցել Ակտոբեում կայացած Վլադիմիր Դվորկովիչի հուշամրցաշարում՝ ցուցադրելով ուժեղ գրոսմայստերներին բնորոշ խաղամակարդակ։
Երիտասարդ միջազգային վարպետը մրցաշարն ավարտել է առանց որևէ պարտության՝ 9 հնարավորից վաստակելով 6 միավոր։ Հատկապես տպավորիչ է այն մրցակիցների մակարդակը, որոնց դեմ Սկլոկին-Բաղիյանը կարողացել է ցուցադրել հասուն և վստահ խաղ։
Մրցաշարի ընթացքում Սերգեյը հաղթանակներ է տարել գրոսմայստերներ Օրիմի Մահդի Ղոլամիի՝ 2530 վարկանիշով, և Նոգերբեկ Կազիբեկի՝ 2513 վարկանիշով, նկատմամբ։ Բացի այդ, հայ շախմատիստը ոչ-ոքի է խաղացել մի շարք հայտնի գրոսմայստերների հետ, որոնց թվում են Անդրեյ Եսիպենկոն (2684), Դանիիլ Դուբովը (2649) և Իվան Շարիչը (2624)։
Մրցաշարի արդյունքներով Սկլոկին-Բաղիյանի վարկանիշային պերֆորմանսը կազմել է 2646։ Հաջող ելույթի շնորհիվ նրա ԷԼՈ վարկանիշը 2440-ից բարձրացել է 2465-ի։
Հիշեցնենք, որ այս տարվա մարտին Սերգեյ Սկլոկին-Բաղիյանը փոխել է մարզական քաղաքացիությունը՝ ռուսականից անցնելով հայկականի։ Միևնույն ժամանակ նա արդեն մի քանի տարի բնակվում է Հայաստանում և հենց այստեղ է սկսել պրոֆեսիոնալ կերպով զբաղվել շախմատով։
Ներկայում 13-ամյա շախմատիստը կրում է միջազգային վարպետի (IM) կոչում։ Նրա կարիերայի հաջորդ կարևոր նպատակը գրոսմայստերի (GM) կոչում ստանալն է։