Հայաստանի կանանց Մ-17 հավաքականը իմացավ մրցակիցներին Եվրո-2026/27-ի որակավորման փուլում
- Հեղինակ: Vahe Hakobyan
- Sportaran
Հայաստանի կանանց մինչև 17 տարեկանների հավաքականը իմացավ իր մրցակիցներին 2026/27 մրցաշրջանի Եվրոպայի առաջնության որակավորման առաջին փուլում։
Վիճակահանությունը կայացել է Շվեյցարիայի Նիոն քաղաքում։ Դրա արդյունքում Հայաստանի հավաքականն ընդգրկվել է B լիգայի B2 խմբում, որտեղ կմրցի Թուրքիայի, Անդորրայի և Մոնտենեգրոյի Մ-17 հավաքականների հետ։
Հայաստանի կանանց Մ-17 հավաքականի համար սա վերադարձ է միջազգային մրցասպարեզ՝ դադարից հետո. 2025 թվականին թիմը չէր մասնակցել մրցաշարերի, իսկ այժմ կրկին հանդես կգա ընտրական փուլում։
Մրցաշարի ձևաչափի համաձայն՝ A լիգայում 28 հավաքականներ բաժանվել են յոթ խմբի՝ յուրաքանչյուրում չորս թիմ։ Խաղերը կանցկացվեն մեկ վայրում՝ մինի-մրցաշարերի ձևաչափով։ Իրենց խմբերում վերջին՝ չորրորդ տեղերը զբաղեցրած թիմերը կնահանջեն B լիգա։
B լիգայում մասնակցում են 22 հավաքականներ։ Դրանք բաժանվել են չորս խմբի՝ յուրաքանչյուրում չորս թիմ, և երկու խմբի՝ յուրաքանչյուրում երեք թիմ։ Վեց խմբերի հաղթողները, ինչպես նաև երկրորդ տեղ զբաղեցրած լավագույն թիմերը, կբարձրանան A լիգա։
Երկու լիգաներում էլ որակավորման առաջին փուլի հանդիպումները պետք է անցկացվեն մինչև 2026 թվականի դեկտեմբերի 5-ը։
Կանանց Մ-17 Եվրոպայի առաջնության 2026/27 մրցաշրջանի եզրափակիչ փուլը կկայանա Ֆինլանդիայում։