Սկսվել է Հայաստան — Լատվիա հանդիպման տոմսերի վաճառքը Ազգերի լիգայում

Հայաստանի ֆուտբոլի ֆեդերացիան հայտարարել է ՈւԵՖԱ-ի Ազգերի լիգայի շրջանակում Հայաստանի և Լատվիայի ազգային հավաքականների հանդիպման տոմսերի վաճառքի մեկնարկի մասին։

C2 խմբի հանդիպումը կկայանա սեպտեմբերի 25-ին՝ Երևանի Վազգեն Սարգսյանի անվան «Հանրապետական» մարզադաշտում։ Խաղի մեկնարկը նախատեսված է ժամը 20:00-ին։

Տոմսերն արդեն հասանելի են պաշտոնական tickets.ffa.am հարթակում։ ՀՖՖ-ի մամուլի ծառայության հաղորդմամբ՝ ինչպես այս, այնպես էլ Հայաստանի ազգային հավաքականի հաջորդ բոլոր տնային հանդիպումների տոմսերը վաճառվելու են բացառապես առցանց։ Տոմսերի ֆիզիկական վաճառք չի նախատեսվում։

Յուրաքանչյուր օգտատեր կարող է ձեռք բերել ոչ ավելի, քան չորս տոմս։ Վճարումից հետո գնված տոմսերը կհայտնվեն tickets.ffa.am կայքի անձնական հաշվում, սակայն մարզադաշտ մուտք գործելու համար նախատեսված QR կոդերը կակտիվանան միայն հանդիպման օրը։

Տոմս գնելու համար երկրպագուները պետք է նախապես նույնականացում անցնեն ՀՖՖ-ի հարթակում՝ տրամադրելով անձնագրային տվյալները։ Անհրաժեշտ տեղեկատվությունն ուղարկելուց հետո հարկավոր է սպասել հաստատմանը։ Ստուգումն իրականացվում է ամեն օր՝ ժամը 10:00-ից մինչև 20:00-ն, և տևում է մինչև 30 րոպե։

Տոմսերի արժեքը.

• Հյուսիսային և Հարավային տրիբունաներ՝ 1000-ից մինչև 5000 դրամ,
• Արևելյան տրիբունա՝ 4000-ից մինչև 8000 դրամ,
• Արևմտյան տրիբունա՝ 12 000-ից մինչև 16 000 դրամ։

Լատվիայի դեմ հանդիպումը Հայաստանի հավաքականի համար կլինի Ազգերի լիգայի նոր խաղարկության առաջին հանդիպումը։ Հաջորդ խաղը թիմը նույնպես կանցկացնի սեփական հարկի տակ՝ սեպտեմբերի 28-ին ընդունելով Չեռնոգորիայի հավաքականին։

ՀՖՖ-ի ղեկավարությունը, Մելիքյանը և Սպերցյանը դիմել են երկրպագուներին Ազգերի լիգայի մեկնարկից առաջ