Սևիկյանը նորամուտը նշեց Իսպանիայում․ «Սեուտան» պարտվեց «Բուրգոսին»

Հայաստանի ազգային հավաքականի կիսապաշտպան Էդգար Սևիկյանն իր առաջին հանդիպումն անցկացրեց իսպանական «Սեուտայի» կազմում։

Իսպանիայի Սեգունդայի 2026/27 մրցաշրջանի 5-րդ տուրի մեկնարկային խաղում «Սեուտան» հյուրընկալվելիս 1:3 հաշվով պարտվեց «Բուրգոսին»։

Հյուրերը հաջող սկսեցին հանդիպումը և արդեն 14-րդ րոպեին Կառլոս Էռնանդեսի գոլի շնորհիվ առաջ անցան հաշվի մեջ։ Սակայն «Սեուտայի» առավելությունը երկար չպահպանվեց․ 20-րդ րոպեին Ալբերտո Դադիեն վերականգնեց հավասարակշռությունը։

Ընդմիջումից անմիջապես հետո «Բուրգոսը» կարողացավ առաջ անցնել հաշվի մեջ․ 48-րդ րոպեին աչքի ընկավ Ջոն Կարիկաբուրուն։ Հանդիպման վերջնական հաշիվը ձևավորվեց 82-րդ րոպեին, երբ Կառլոս Ռեդրուելո Նիմոն գնդակն ուղարկեց սեփական դարպասը։

Էդգար Սևիկյանը խաղադաշտ դուրս եկավ մեկնարկային րոպեներից և այդպիսով նորամուտը նշեց իր նոր ակումբի կազմում։ Հայ ֆուտբոլիստը, որը «Սեուտա» է տեղափոխվել վարձավճարով հունգարական «Ֆերենցվարոշից», խաղադաշտում անցկացրեց 71 րոպե։

Այդ ընթացքում Սևիկյանը կատարել է 14 ճշգրիտ փոխանցում՝ 86% ճշգրտությամբ, իրականացրել մեկ գնդակի խլում, երկու ընդհատում և հինգ անգամ վերադարձրել է գնդակը թիմին։ Կիսապաշտպանը հաղթել է յոթ մենապայքարներից երկուսում՝ հաջող ավարտելով օդային երկու մենապայքարներն էլ։ Նրա հաշվին գրանցվել է նաև գնդակի ութ կորուստ։

Հանդիպման ավարտից հետո SofaScore-ը Հայաստանի հավաքականի ֆուտբոլիստի խաղը գնահատել է 6,7 միավոր։

Հինգ տուրից հետո «Սեուտան» դեռ ոչ մի միավոր չի վաստակել և զբաղեցնում է Սեգունդայի մրցաշարային աղյուսակի վերջին հորիզոնականը։