Հայաստանի Մ20 հավաքականը մեկնարկում է Եվրոպայի առաջնության B դիվիզիոնում

Հուլիսի 10-ին Բրատիսլավայում կմեկնարկի բասկետբոլի Մ20 Եվրոպայի առաջնության B դիվիզիոնի մրցաշարը։ Հայաստանի երիտասարդական հավաքականը կմասնակցի մրցաշարին և հանդես կգա C խմբում։

Խմբային փուլում Հայաստանի հավաքականի մրցակիցներն են լինելու Կոսովոն, Պորտուգալիան, Իսլանդիան, Կիպրոսը, ինչպես նաև Բոսնիա և Հերցեգովինան։ Մրցաշարը կանցկացվի Սլովակիայի մայրաքաղաքում հուլիսի 10-ից 19-ը, իսկ B դիվիզիոնում ընդհանուր առմամբ կմասնակցի 21 հավաքական։

C խումբը բավական մրցակցային տեսք ունի։ Կոսովոն նախորդ տարի B դիվիզիոնում զբաղեցրել էր 8-րդ տեղը, Պորտուգալիան եզրափակել էր մրցաշարը 10-րդ հորիզոնականում, իսկ Հայաստանը զբաղեցրել էր 16-րդ տեղը։ Իսլանդիան մեկ տարի առաջ հանդես էր գալիս A դիվիզիոնում և զբաղեցրել էր 14-րդ տեղը, ինչից հետո նահանջել էր ուժով երկրորդ դիվիզիոն։ Կիպրոսը և Բոսնիան նախորդ խաղարկությանը չէին մասնակցել։

Հայաստանի հավաքականի համար սա հնարավորություն է բարելավելու նախորդ տարվա արդյունքը։ 2025 թվականին Մ20 Եվրոպայի առաջնության B դիվիզիոնի մրցաշարն անցկացվել էր Երևանում։ Այդ ժամանակ Հայաստանի թիմը տարել էր մեկ հաղթանակ՝ Էստոնիայի նկատմամբ, և 21 մասնակիցների թվում զբաղեցրել էր 16-րդ տեղը։ Միևնույն ժամանակ հայկական թիմը շատ մոտ էր հաջողությանը Դանիայի և Ավստրիայի դեմ խաղերում, որտեղ պարտվել էր համապատասխանաբար 1 և 2 միավորի տարբերությամբ։

Հիշեցնենք, որ այսօր Երևանում մեկնարկում է նաև Մ16 Եվրոպայի առաջնության C դիվիզիոնի մրցաշարը։ Այսպիսով, հուլիսը հագեցած ամիս կլինի հայկական բասկետբոլի համար․ Հայաստանի միանգամից երկու պատանեկան հավաքականներ հանդես կգան միջազգային ասպարեզում։