Հայաստանի հավաքականը հաղթանակով մեկնարկեց Դևիսի գավաթում

Հայաստանի թենիսի հավաքականը հաջող մեկնարկեց Դևիսի գավաթի Եվրոպական գոտու IV խմբում։ Առաջին խաղում, որն անցկացվում է Ծաղկաձորում, Հայաստանի թիմը վստահ հաղթանակ տարավ Անդորրայի հավաքականի նկատմամբ՝ 3:0 հաշվով։

Առաջին մենախաղում 18-ամյա Դավիթ Պողոսյանը հաղթեց Պաբլո Կարասկոսային՝ 6:1, 6:2 հաշվով։ Այնուհետև 18-ամյա Միքայել Ավանեսյանը ամրապնդեց Հայաստանի առավելությունը՝ երկու սեթում հաղթելով Էրիկ Սերվոս Նոգերին՝ 6:3, 7:5։

Զուգախաղում հանդես եկան 18-ամյա Սամվել Աղայանը և Ավետիկ Ղազարյանը, որոնք նույնպես հաղթանակի հասան։ Հայկական զույգը ուժեղ գտնվեց Պաբլո Կարասկոսա / Էրիկ Սերվոս Նոգեր զույգից՝ 6:2, 6:4 հաշվով։

Այսպիսով, Հայաստանի հավաքականը մրցաշարը սկսեց առավելագույն արդյունքով՝ 3:0 հաղթանակով։

Հաջորդ հանդիպումը Հայաստանի թիմը կանցկացնի հունիսի 17-ին Սան Մարինոյի հավաքականի դեմ։ Մեկնարկային տուրում Սան Մարինոն 0:3 հաշվով պարտվել էր Իսլանդիայի հավաքականին։

Հիշեցնենք, որ Դևիսի գավաթի Եվրոպական գոտու IV խմբի հանդիպումները Ծաղկաձորում անցկացվում են հունիսի 16-ից 20-ը։