Հայաստանի ֆուտզալի հավաքականը բարձրացել է ՖԻՖԱ-ի վարկանիշային աղյուսակի 15-րդ հորիզոնական

Հայաստանի ֆուտզալի հավաքականը թարմացրել է իր լավագույն ցուցանիշը ՖԻՖԱ-ի վարկանիշային աղյուսակում և բարձրացել 15-րդ հորիզոնական։

Նոր թարմացումից հետո Հայաստանի թիմը հավաքել է 1255,16 միավոր և միանգամից բարձրացել ութ հորիզոնականով։ Վարկանիշի նախորդ տարբերակում, որը հրապարակվել էր 2025 թվականի դեկտեմբերին՝ Եվրո-2026-ի մեկնարկից առաջ, Հայաստանը զբաղեցնում էր 23-րդ տեղը։

Հատկապես տպավորիչ է Հայաստանի հավաքականի միավորային առաջընթացը։ Թիմը վաստակել է 61,06 միավոր ավելի, ինչը լավագույն ցուցանիշն է եվրոպական բոլոր հավաքականների շարքում։ Այս ցուցանիշով Հայաստանը գերազանցել է Հյուսիսային Մակեդոնիային, որը ավելացրել է 60,95 միավոր, և Խորվաթիային՝ 48,01 միավոր առաջընթացով։

Նույնիսկ Եվրո-2026-ի հաղթող Իսպանիայի հավաքականը ավելի փոքր աճ է գրանցել՝ 44,72 միավոր։ Դա եվրոպական թիմերի շարքում չորրորդ արդյունքն է։

Հայաստանի բարձրացումը վարկանիշային աղյուսակում Եվրո-2026-ում հաջող ելույթի հետևանքն է։ Թիմն իր պատմության մեջ առաջին անգամ հասավ մրցաշարի քառորդ եզրափակիչ, որտեղ պարտվեց Խորվաթիային։

ՖԻՖԱ-ի ֆուտզալի վարկանիշային աղյուսակի թոփ-15-ը

1. Բրազիլիա
2. Պորտուգալիա
3. Իսպանիա
4. Արգենտինա
5. Իրան
6. Մարոկկո
7. Ռուսաստան
8. Ղազախստան
9. Ուկրաինա
10. Ֆրանսիա
11. Թաիլանդ
12. Ճապոնիա
13. Խորվաթիա
14. Ինդոնեզիա
15. Հայաստան