2028 թվականի Օլիմպիական խաղերում ծանրամարտի քաշային կարգերի քանակը կավելանա

Միջազգային օլիմպիական կոմիտեի (IOC) գործադիր կոմիտեն հաստատել է ծանրամարտի մրցումների ծրագրում երկու լրացուցիչ քաշային կարգերի ընդգրկումը՝ 2028 թվականի Լոս Անջելեսում կայանալիք Օլիմպիական խաղերում։

Այսպիսով, մարզիկները մեդալների համար կպայքարեն արդեն 12 քաշային կարգերում՝ 6-ը տղամարդկանց, 6-ը կանանց համար։ Մասնակիցների ընդհանուր քվոտան կմնա անփոփոխ՝ 120 մարզիկ (60 տղամարդ և 60 կին), յուրաքանչյուր քաշային կարգում՝ 10-ական։ Մրցումները տեղի կունենան նախապես սահմանված ժամկետներում՝ 2028 թվականի հուլիսի 25-29-ը։

Այս որոշումը կայացվեց Միջազգային ծանրամարտի ֆեդերացիայի (IWF) դիմումի և Մարզիկների հանձնաժողովի նախաձեռնության արդյունքում։ Նրանց կարծիքով՝ քաշային կարգերի ավելացումը կնպաստի խմբերի ավելի հավասար բաշխմանը, ինչը կնվազեցնի մարզիկների ծանրաբեռնվածությունը և առողջական ռիսկերը։

IWF-ի նախագահ Մոհամեդ Ջալուդը նշեց, որ լրացուցիչ քաշային կարգերի ընդգրկումը Օլիմպիական խաղերը կդարձնի ավելի դիտարժան և արդար․

«IOC-ը հաշվի առավ մեր փաստարկները, և մենք շատ ուրախ ենք այս առաջընթացի համար։ Համոզված եմ, որ Լոս Անջելեսում մեզ սպասվում է պայծառ օլիմպիական շոու, որը հաճույք կպատճառի և՛ երկրպագուներին, և՛ մարզիկներին»։

Մինչև 2025 թվականի ավարտը IWF-ը պետք է որոշի Լոս Անջելեսի խաղերում ընդգրկվելիք քաշային կարգերի ճշգրիտ ցանկը։

Հիշեցնենք, որ 2025 թվականի ամռանից ուժի մեջ են մտնում ծանրամարտի նոր քաշային կարգերը․

Մեծահասակներ և երիտասարդներ՝
Կանայք․ 48, 53, 58, 63, 69, 77, 86, +86 կգ
Տղամարդիկ․ 60, 65, 71, 79, 88, 94, 110, +110 կգ

IWF-ը պետք է այս ցուցակից ընտրի 6-ական քաշային կարգեր 2028 թվականի Օլիմպիական խաղերի համար։ Հոկտեմբերի 2-11-ը Նորվեգիայի Ֆյորդե քաղաքում կանցկացվի առաջին աշխարհի առաջնությունը նոր քաշային կարգերով։

Հայ ծանրամարտիկների ելույթների ժամանակացույցը՝ Աշխարհի առաջնություն 2025