Հայտնի է՝ ինչու է «Ցրվենա Զվեզդան» ցանկանում վաճառել Տիկնիզյանին

Հայաստանի ազգային հավաքականի պաշտպան Նաիր Տիկնիզյանը կարող է հեռանալ «Ցրվենա Զվեզդայից» ամառային տրանսֆերային պատուհանի ընթացքում։ Այս մասին հայտնում է սերբական Mozzartsport մամուլը։

Աղբյուրի տեղեկություններով՝ բելգրադյան ակումբը դիտարկում է թիմի ձախ պաշտպաններից մեկին՝ Նաիր Տիկնիզյանին կամ Ադեմ Ավդիչին վաճառելու հնարավորությունը։ Պատճառն այն է, որ «Ցրվենա Զվեզդան» հետաքրքրված է «Զալցբուրգի» ձախ պաշտպան Ալեքսա Տերզիչի ծառայություններով, սակայն նրա տրանսֆերի ուղղությամբ կոնկրետ քայլեր չի ձեռնարկի, մինչև այդ դիրքում տեղ չազատի կազմի և բյուջեի առումով։

Ակումբում հասկանում են, որ ամռանը առնվազն մեկ ձախ պաշտպանի հեռանալը իրատեսական տարբերակ է թվում։ Միևնույն ժամանակ, այդ դիրքի երկու ֆուտբոլիստներին միաժամանակ վաճառելը չափազանց ռիսկային տարբերակ է համարվում, քանի որ դա կարող է թուլացնել կազմի խորությունը նոր մրցաշրջանից և եվրագավաթային խաղերից առաջ։

Նշվում է, որ Տիկնիզյանի տեղափոխությունը կարող է Սերբիայի չեմպիոնին բերել մոտ 5 մլն եվրո։ «Ցրվենա Զվեզդայի» համար նման գործարքը ֆինանսապես շահավետ կլինի․ ավելի վաղ ակումբը ֆուտբոլիստին ձեռք էր բերել 2 մլն եվրոյից պակաս գումարով։

Ընթացիկ մրցաշրջանում Տիկնիզյանը «Ցրվենա Զվեզդայի» կազմում դարձել է Սերբիայի չեմպիոն։ Սա պաշտպանի կարիերայում առաջին չեմպիոնական տիտղոսն է ազգային առաջնության մակարդակով։ Ընդհանուր առմամբ, մրցաշրջանում նա բոլոր մրցաշարերում անցկացրել է 44 հանդիպում, խփել 1 գոլ և կատարել 6 գոլային փոխանցում։

Transfermarkt պորտալը 26-ամյա ֆուտբոլիստի շուկայական արժեքը գնահատում է 5 մլն եվրո։