Էդուարդ Սողոմոնյանը նորամուտը կնշի Power Slap-ում․ հայ ըմբիշը կմասնակցի Դանա Ուայթի մրցաշարին Լաս Վեգասում

Հունահռոմեական ոճի ըմբիշ Էդուարդ Սողոմոնյանը ուժերը կփորձի մենամարտային նոր ձևաչափում։ Մայիսի 15-ին Լաս Վեգասում նա կմասնակցի Power Slap 20: Trujillo vs Johnson մրցաշարին, որտեղ նրա մրցակիցը կլինի ամերիկացի Բրայս Ջոնսը։

Մենամարտը կանցկացվի ծանր քաշային կարգում։ Power Slap-ի պաշտոնական կայքի համաձայն՝ մրցաշարը տեղի կունենա Լաս Վեգասի The Chelsea at The Cosmopolitan of Las Vegas սրահում։ Երեկոյի գլխավոր մենամարտում Ռոբերտ Տրուխիլյոն կմրցի Հայդեն Ջոնսոնի հետ։

Power Slap-ը ապտակների լիգա է, որը ղեկավարում է UFC-ի նախագահ Դանա Ուայթը։

Հայկական սպորտի համար սա առանձնահատուկ պահ կլինի․ Power Slap-ում առաջին անգամ ելույթ կունենա հայկական ծագումով մարզիկ։ Ընդ որում՝ խոսքը ոչ թե սպորտային աշխարհի նորեկի, այլ միջազգային մակարդակի փորձառու ըմբիշի մասին է։

Էդուարդ Սողոմոնյանը ծնվել է Երևանում, սակայն վերջին տարիներին ներկայացրել է Բրազիլիան։ Նա հանդես է եկել հունահռոմեական ըմբշամարտի մինչև 130 կգ քաշային կարգում և երկու անգամ մասնակցել է Օլիմպիական խաղերին՝ Ռիո-2016-ին և Տոկիո-2020-ին։

Սողոմոնյանը նաև մեծ փորձ ունի Ամերիկյան մայրցամաքում անցկացված մրցումներում։ Նա նվաճել է 2016 թվականի Պանամերիկյան առաջնության արծաթե մեդալը, 2015 թվականին դարձել է Հարավային Ամերիկայի չեմպիոն, ինչպես նաև Պանամերիկյան օլիմպիական վարկանիշային մրցաշարի միջոցով Բրազիլիայի համար նվաճել է Տոկիոյի Օլիմպիական խաղերի ուղեգիր։

Տարիներ շարունակ Սողոմոնյանը եղել է Պանամերիկյան տարածաշրջանի ուժեղագույն ծանրքաշայիններից մեկը։ Այս քաշային կարգում նա հաճախ մրցակցել է այնպիսի առաջատար ըմբիշների հետ, ինչպիսիք են կուբացիներ Օսկար Պինոն և Միխաին Լոպեսը։

Այժմ 36-ամյա ըմբիշը կփորձի իրեն նոր ձևաչափում։ Նրա մրցակից Բրայս Ջոնսն արդեն Power Slap-ում ելույթների փորձ ունի, մինչդեռ Սողոմոնյանի համար սա կլինի նորամուտ լիգայում։

Power Slap 20 մրցաշարը կկայանա մայիսի 15-ին Լաս Վեգասում։