Սամվել Տերտերյանը ռևանշ վերցրեց Պուտկարաձեից․ հայ ըմբիշների չորս հաղթանակը Բունդեսլիգայում

Հայ ըմբիշներ Սամվել Տերտերյանը, Հայկ Խլոյանը, Գասպար Տերտերյանը և Տիգրան Մինասյանը հաղթանակներ են տարել ըմբշամարտի Գերմանիայի Բունդեսլիգայի ութերորդ տուրում։

Առանձնահատուկ ուշադրության կենտրոնում էր Սամվել Տերտերյանի և վրացի Անրի Պուտկարաձեի գոտեմարտը մինչև 80 կգ քաշային կարգում։ Տերտերյանը վստահ հաղթանակ է տարել 9։2 հաշվով՝ ռևանշ վերցնելով մինչև 23 տարեկանների աշխարհի առաջնությունում կրած պարտության համար։

Խոշոր հաշվով հաղթանակներ են տոնել Հայկ Խլոյանն ու Տիգրան Մինասյանը։ Խլոյանը մինչև 98 կգ քաշային կարգում 19։4 հաշվով առավելության է հասել ֆին Վալտերի Լատվալայի նկատմամբ, իսկ Մինասյանը մինչև 61 կգ քաշային կարգում գերմանացի Լարս Կեստերնիխին հաղթել է 16։0 հաշվով՝ մրցակցին ոչ մի միավոր չզիջելով։ Հաջող է հանդես եկել նաև Գասպար Տերտերյանը, որը մինչև 75 կգ քաշային կարգում 4։0 հաշվով հաղթել է գերմանացի Էրիկ Վագներին։

Հայ ըմբիշների արդյունքներն ութերորդ տուրում․

• 61 կգ․ Տիգրան Մինասյան — Լարս Կեստերնիխ (Գերմանիա)՝ 16։0։

• 75 կգ․ Գասպար Տերտերյան — Էրիկ Վագներ (Գերմանիա)՝ 4։0։

• 80 կգ․ Սամվել Տերտերյան — Անրի Պուտկարաձե (Վրաստան)՝ 9։2։

• 98 կգ․ Հայկ Խլոյան — Վալտերի Լատվալա (Ֆինլանդիա)՝ 19։4։