Հարվի Սարաջյանն ընտրել է Հայաստանի հավաքականը․ ՀՖՖ-ն հաստատել է «Օռլանդո Սիթիի» վինգերի որոշումը

«Օռլանդո Սիթիի» 21-ամյա վինգեր Հարվի Սարաջյանը (Harvey Sarajian) ընդունել է Հայաստանի հավաքականում հանդես գալու հրավերը։ Այս մասին նոյեմբերի 10-ին հայտնել է Հայաստանի ֆուտբոլի ֆեդերացիան։

Բանակցություններին անմիջական մասնակցություն է ունեցել Հյուսիսային Ամերիկայում ՀՖՖ դեսպան Յուրա Մովսիսյանը։ Հայաստանի հավաքականի նախկին հարձակվողն անձամբ հանդիպել է ֆուտբոլիստի հետ Օռլանդոյում և քննարկել ազգային թիմին միանալու հնարավորությունը։

Մովսիսյանի խոսքով՝ ինքը վաղուց է հետևում Սարաջյանի ելույթներին։ Վինգերի վերջին արդյունավետ հանդիպումներից հետո նա կապ է հաստատել ՀՖՖ նախագահ Արմեն Մելիքբեկյանի և հավաքականի գլխավոր մարզիչ Եղիշե Մելիքյանի հետ՝ առաջարկելով հրավիրել ֆուտբոլիստին։

«Նրանք նույնպես ուսումնասիրեցին Հարվիի խաղը և համաձայնեցին իմ գնահատականին, որից հետո ես կապ հաստատեցի Հարվիի հետ։ Շաբաթ և կիրակի օրերն անցկացրի Օռլանդոյում, հանդիպեցի Հարվիի հետ։ Նա համաձայնեց խաղալ մեր ազգային հավաքականում և շատ ուրախ էր նման հնարավորության համար», — պատմել է Մովսիսյանը։

Ընթացիկ մրցաշրջանում Սարաջյանը «Օռլանդո Սիթիի» հիմնական թիմի կազմում անցկացրել է 14 հանդիպում, խփել երկու գոլ և կատարել մեկ գոլային փոխանցում։ Ակումբի երկրորդ թիմի կազմում նա մասնակցել է 16 հանդիպման՝ գրանցելով վեց գոլ և վեց գոլային փոխանցում։

Սարաջյանը կարող է գործել հարձակման երկու եզրերում։ Հայաստանի հավաքականում հանդես գալու նրա որոշումն ընդլայնում է ազգային թիմի մարզչական շտաբի ընտրության հնարավորություններն այդ դիրքերում։

Մովսիսյանը նաև նշել է, որ ֆուտբոլիստի հայրն ու պապը հայեր են, իսկ նրա ընտանիքը մեծ ոգևորությամբ է ընդունել Հայաստանի հավաքականում Հարվիի հանդես գալու հնարավորությունը։

ՀՖՖ-ն առայժմ չի հայտնել, թե Սարաջյանը երբ կմիանա հավաքականին և երբ կարող է նշել իր նորամուտը։