Գևորգ Ղազարյանը հայտարարել է ՀՖՖ նախագահի պաշտոնում իր թեկնածությունն առաջադրելու մասին

Հայաստանի հավաքականի նախկին ֆուտբոլիստ Գևորգ Ղազարյանը հայտարարել է Հայաստանի ֆուտբոլի ֆեդերացիայի նախագահի պաշտոնում իր թեկնածությունն առաջադրելու որոշման մասին։ ՀՖՖ նախագահի ընտրությունները կկայանան դեկտեմբերի 21-ին։

Երկրպագուներին ուղղված իր ուղերձում Ղազարյանը շնորհակալություն է հայտնել բոլոր նրանց, ովքեր առաջարկել և աջակցել են իր թեկնածությանը։ Նա ընդգծել է, որ իր որոշումը կապված է հայկական ֆուտբոլի ապագայի և մեծ պատասխանատվության հետ։

«Ինձ համար սա բարձր պաշտոնի կամ անձնական շահերի հարց չէ։ Խոսքը հայկական ֆուտբոլի ապագայի և մեծ պատասխանատվության մասին է», — հայտարարել է Ղազարյանը։

Ազգային հավաքականի նախկին ֆուտբոլիստի խոսքով՝ Հայաստանի հավաքականում, հայկական և արտասահմանյան ակումբներում հանդես գալու բազմամյա փորձն իրեն հնարավորություն է տվել ծանոթանալու տարբեր ֆուտբոլային համակարգերի և ներսից տեսնելու հայկական ֆուտբոլի խնդիրներն ու հնարավորությունները։

Ղազարյանը կարծում է, որ հայկական ֆուտբոլի ներուժն իրացնելու համար անհրաժեշտ են համակարգային փոփոխություններ, հստակ ռազմավարություն, պրոֆեսիոնալ կառավարում և զարգացման երկարաժամկետ ծրագիր։

Առաջնահերթությունների թվում նա նշել է մանկապատանեկան ֆուտբոլի զարգացումը, մարզիչների կրթությունը, ժամանակակից ենթակառուցվածքների ստեղծումը, ակումբների հետ արդյունավետ համագործակցությունն ու Հայաստանի հավաքականի մրցունակության բարձրացումը։

Ղազարյանն առանձին ընդգծել է ընտրական գործընթացի թափանցիկության կարևորությունը։

«Ինձ համար կարևոր է, որ ՀՖՖ նախագահի ընտրությունները լինեն բաց և արդար։ Ես առաջադրում եմ իմ թեկնածությունը ՀՖՖ նախագահի պաշտոնում», — հայտնել է նա։

Ներկայում Գևորգ Ղազարյանն աշխատում է որպես «Արարատ-Արմենիայի» գլխավոր մարզչի օգնական։