Բրազիլացի պաշտպան Սեզարը տեղափոխվեց «Ալաշկերտ»
- Հեղինակ: Vahe Hakobyan
- Sportaran
«Ալաշկերտը» հայտարարել է բրազիլացի կենտրոնական պաշտպան Սեզարի հետ պայմանագիր կնքելու մասին։ 26-ամյա ֆուտբոլիստը դարձավ երևանյան ակումբի հերթական նորեկը ամառային տրանսֆերային պատուհանի ընթացքում։
Սեզարի վերջին ակումբը եղել է ադրբեջանական «Շամախին»։ Նախորդ մրցաշրջանում բրազիլացի պաշտպանը թիմի կազմում անցկացրել է 33 հանդիպում և դարձել 3 գոլի հեղինակ։ Մինչ Ադրբեջան տեղափոխվելը նա հանդես է եկել հայրենիքում՝ Բրազիլիայի C և D սերիաներում։
«Ալաշկերտն» առայժմ բավական զգուշորեն է վարում տրանսֆերային արշավը։ Թիմը պահպանում է դիրքային հավասարակշռությունը և փաստացի կատարում է կետային փոխարինումներ․ հայ պաշտպան Յուրի Գարեգինյանի փոխարեն պայմանագիր է կնքվել Հակոբ Հակոբյանի հետ, իսկ բրազիլացի Կլայդեր Մասեդոյի հեռանալուց հետո ակումբը հրավիրել է մեկ այլ բրազիլացի կենտրոնական պաշտպանի՝ Սեզարին։
Նախորդ մրցաշրջանի արդյունքներով «Ալաշկերտը» Հայաստանի առաջնությունում զբաղեցրեց 4-րդ տեղը և եվրագավաթներում հանդես գալու իրավունք ստացավ։ Թիմը Կոնֆերենցիաների լիգայում իր ելույթը կսկսի որակավորման առաջին փուլից։