Ալեքս Մարգարյանը դարձել է Եվրոպայի Մ20 առաջնության արծաթե մեդալակիր

Հայաստանի հունահռոմեական ոճի ըմբիշ Ալեքս Մարգարյանը նվաճել է արծաթե մեդալ Եվրոպայի Մ20 առաջնությունում, որն անցկացվում է Սկոպյեում։

Մարգարյանը հանդես էր գալիս մինչև 63 կգ քաշային կարգում և վստահորեն հասավ եզրափակիչ։ Որոշիչ գոտեմարտի ճանապարհին Հայաստանի ներկայացուցիչը չորս անընդմեջ հաղթանակ տարավ՝ առավելության հասնելով Ռուսաստանի, Ֆրանսիայի, Բելառուսի և Հունաստանի ներկայացուցիչների նկատմամբ։

Եզրափակչում Ալեքս Մարգարյանը մրցեց ուկրաինացի Մաքսուտ Սուլթանովի հետ և պարտվեց 3:12 հաշվով՝ դառնալով մրցաշարի արծաթե մեդալակիր։

Նշենք, որ ավելի վաղ Մարգարյանը դարձել էր նաև Մ20 աշխարհի առաջնության արծաթե մեդալակիր։

Ալեքս Մարգարյանի արդյունքները Եվրոպայի Մ20 առաջնությունում

1/16 եզրափակիչ. Ալեքս Մարգարյան — Սալիմ Կազմախով (Ռուսաստան) — 2:1

1/8 եզրափակիչ. Ալեքս Մարգարյան — Իլես Դահմանի (Ֆրանսիա) — 5:0

1/4 եզրափակիչ. Ալեքս Մարգարյան — Դմիտրի Դուդուկ (Բելառուս) — 9:0

1/2 եզրափակիչ. Ալեքս Մարգարյան — Մարիոս Կապանտաիս (Հունաստան) — 10:5

Եզրափակիչ. Ալեքս Մարգարյան — Մաքսուտ Սուլթանով (Ուկրաինա) — 3:12

Ալեքս Մարգարյանի արծաթը Հայաստանի հավաքականի երկրորդ մեդալն է Եվրոպայի Մ20 հունահռոմեական ըմբշամարտի առաջնությունում՝ Էդգար Պետրոսյանի պարգևից հետո։