Ժան-Պոլ Բոսնոյանը UFC-ում երրորդ հաղթանակը տարավ՝ պարտության մատնելով մինչ այդ անպարտելի ադրբեջանցի մարտիկին
- Հեղինակ: Vahe Hakobyan
- Sportaran
Նոյեմբերի 1-ի գիշերը հայկական ծագումով ամերիկացի մարտիկ Ժան-Պոլ Բոսնոյանը (Լեբոսնոյանի) UFC-ում տարավ իր երրորդ անընդմեջ հաղթանակը։ Լաս Վեգասում կայացած UFC Fight Night մրցաշարում 27-ամյա մարզիկը տեխնիկական նոկաուտով հաղթեց մինչ այդ անպարտելի ադրբեջանցի Ֆարման Հասանովին։
Մենամարտն անցկացվեց կիսամիջին քաշային կարգում (մինչև 77 կգ)։ Առաջին իսկ րոպեներից Բոսնոյանը հարվածային պայքարում առավելություն ուներ՝ պարբերաբար դիպուկ հարվածներ հասցնելով մրցակցի գլխին։ Հայազգի մարտիկը վստահորեն վերահսկում էր հարվածների փոխանակումները և աստիճանաբար ավելի մեծ վնաս հասցնում Հասանովին։
Առաջին երկու ռաունդների արդյունքներով երեք մրցավարներն էլ առավելությունը տվել էին Բոսնոյանին։
Երրորդ ռաունդում մենամարտը դադարեցվեց բժշկի որոշմամբ՝ ադրբեջանցի մարտիկի դեմքին առաջացած ուժեղ պատռվածքի պատճառով։ Տեխնիկական նոկաուտով հաղթանակը պաշտոնապես գրանցվեց երրորդ ռաունդի 2-րդ րոպե 11-րդ վայրկյանին։
Այսպիսով, Բոսնոյանը UFC-ում անցկացրած երեք մենամարտերում տարավ իր երրորդ հաղթանակը՝ պահպանելով անպարտելիության ցուցանիշը խառը մենամարտերի աշխարհի առաջատար կազմակերպությունում։ Նրա պրոֆեսիոնալ կարիերայի ցուցանիշն այժմ կազմում է 12 հաղթանակ և 2 պարտություն (12-2)։
Հասանովի համար սա առաջին պարտությունն էր պրոֆեսիոնալ կարիերայում։ Նրա ցուցանիշն այժմ 5-1 է։
Հիշեցնենք, որ Ժան-Պոլ Բոսնոյանը հայկական արմատներ ունի հոր կողմից։ Նրա հայրը՝ Ներսես Բոսնոյանը, բրազիլական ջիու-ջիցուի մարզիչ է։ Ավելի վաղ Ժան-Պոլը բազմիցս ընդգծել է, որ հպարտանում է իր հայկական ծագմամբ։