Վահան Բիչախչյանը վնասվածքի պատճառով բաց կթողնի մրցաշրջանի մնացած հատվածը

«Լեգիայի» և Հայաստանի ազգային հավաքականի կիսապաշտպան Վահան Բիչախչյանը ազդրի քառագլուխ մկանի վնասվածքի պատճառով հաստատ չի մասնակցի ակումբային մրցաշրջանի մնացած հանդիպումներին։

Ավելին, հարցականի տակ է նաև 26-ամյա ֆուտբոլիստի մասնակցությունը Հայաստանի հավաքականի հունիսյան ընկերական հանդիպումներին Ղազախստանի և Մոլդովայի դեմ։ Այդ հանդիպումները նախատեսված են հունիսի 6-ին և 9-ին։

Բիչախչյանը վնասվածք էր ստացել ապրիլի 6-ին իր նախկին թիմի՝ Շչեցինի «Պոգոնի» դեմ խաղում։ Հետագա բժշկական հետազոտությունները ցույց են տվել, որ վնասվածքն ավելի լուրջ է, քան սկզբում ենթադրվում էր։ Այժմ կիսապաշտպանին սպասվում է վերականգնման երկարատև շրջան։

«Լեգիայի» համար Բիչախչյանի կորուստը հատկապես ցավալի է մրցաշրջանի լարված ավարտի ֆոնին։ Առաջնության ավարտից երեք տուր առաջ Վարշավայի թիմը զբաղեցնում է 9-րդ տեղը և հայտնվել է անսովոր մրցաշարային իրավիճակում․ այն դեռ պահպանում է եվրագավաթների ուղեգիր նվաճելու հնարավորությունները, սակայն միևնույն ժամանակ դեռ չի ապահովել իր անվտանգությունը՝ բարձրագույն խմբում մնալու պայքարում։

Կոնֆերենցիաների լիգայի գոտուց «Լեգիային» բաժանում է 6 միավոր, իսկ անկման գոտուց՝ ընդամենը 4 միավոր։