Վահան Բիչախչյանը նշել է խաղադաշտ վերադառնալու հնարավոր ժամկետները

«Լեգիայի» և Հայաստանի ազգային հավաքականի կիսապաշտպան Վահան Բիչախչյանը պատմել է վերականգնման ընթացքի մասին և նշել խաղադաշտ վերադառնալու հնարավոր ժամկետները։

Ֆուտբոլիստը հույս է հայտնել, որ արդեն հաջորդ շաբաթ կկարողանա վերադառնալ ընդհանուր խմբի մարզումներին։

«Ես հաստատ հավատում եմ, որ եթե ամեն ինչ կարգին լինի, հաջորդ շաբաթ կսկսեմ մարզվել թիմի հետ։ Եթե մարզումների ընթացքում ամեն ինչ լավ անցնի, հնարավոր է՝ կարողանամ մասնակցել «Յագելոնիայի» դեմ հանդիպմանը», — Բիչախչյանն ասել է CANAL+-ին տված հարցազրույցում։

Լեհաստանի առաջնության «Լեգիա» — «Յագելոնիա» հանդիպումը կկայանա սեպտեմբերի 20-ին։ Եթե հայ կիսապաշտպանը հասցնի վերականգնվել և խաղաժամանակ ստանա այդ հանդիպմանը, նա կարող է հասանելի լինել նաև Հայաստանի հավաքականին Ազգերի լիգայի նոր խաղարկության մեկնարկային հանդիպումների համար։

Հայաստանի ազգային հավաքականը մրցաշարը կսկսի սեպտեմբերի 25-ին՝ սեփական հարկի տակ Լատվիայի դեմ հանդիպմամբ։

Վերջին անգամ Բիչախչյանը խաղադաշտ է դուրս եկել օգոստոսի 2-ին։ Լեհաստանի առաջնության երկրորդ տուրի՝ «Զագլեմբեի» դեմ խաղում հայ ֆուտբոլիստը կատարել է գոլային փոխանցում։