Արտյոմ Բանդիկյանը 90 րոպե անցկացրեց ԲԿՄԱ-ի կազմում և օգնեց հաղթել «Լոկոմոտիվին» Ռուսաստանի գավաթում
- Հեղինակ: Vahe Hakobyan
- Sportaran
Հոկտեմբերի 29-ին Մոսկվայի ԲԿՄԱ-ն Ռուսաստանի գավաթի 2026/27 մրցաշրջանի՝ ՌՊԼ ուղու խմբային փուլի 5-րդ տուրում 3:1 հաշվով հաղթեց Մոսկվայի «Լոկոմոտիվին»։ Հայ ֆուտբոլիստ Արտյոմ Բանդիկյանը ընդգրկված էր բանակայինների մեկնարկային կազմում և անցկացրեց ամբողջ հանդիպումը։
Բանդիկյանի համար սա առաջին հանդիպումն էր Հայաստանի ազգային հավաքականից մոսկովյան ակումբ վերադառնալուց հետո։ Հայ ֆուտբոլիստը հանդես եկավ աջ լատերալի դիրքում և ակտիվ մասնակցություն ունեցավ թիմի խաղին։
Հանդիպման սկզբնամասում Բանդիկյանը կարող էր նաև գոլի հեղինակ դառնալ, սակայն ձախ եզրից կատարած փոխանցումից հետո նրա՝ օդից կատարած հարվածը շեղ ստացվեց։
ԲԿՄԱ-ն արագորեն առավելություն ստացավ։ Արդեն 6-րդ րոպեին հաշիվը բացեց Դանիլա Կոզլովը, իսկ 17-րդ րոպեին Ժոաո Վիկտորը կրկնապատկեց տանտերերի առավելությունը։ 38-րդ րոպեին Ալեքսանդր Կովալենկոն կրճատեց «Լոկոմոտիվի» հետ մնալը։
Հանդիպման վերջնական հաշիվը ձևավորվեց 66-րդ րոպեին, երբ հյուրերի պաշտպան Գեորգի Ջիկիան գնդակն ուղարկեց սեփական դարպասը։
Այս հաղթանակի շնորհիվ ԲԿՄԱ-ն հինգ տուրից հետո վաստակեց 8 միավոր և բարձրացավ D խմբի երկրորդ հորիզոնական։ Մոսկովյան ակումբը շարունակում է պայքարը Ռուսաստանի գավաթի ՌՊԼ ուղու փլեյ-օֆֆի ուղեգրի համար։
Խմբային փուլի վերջին տուրում՝ նոյեմբերի 24-ին, ԲԿՄԱ-ն արտագնա խաղում կմրցի Տոլյատիի «Ակրոնի» դեմ։