«Ուրարտուն» Հայաստանի առաջնության խաղի վերջնամասում ձեռքից բաց թողեց հաղթանակը «Արարատի» նկատմամբ

Հայաստանի ֆուտբոլի առաջնության 9-րդ տուրում Երևանի «Ուրարտուն» և «Արարատը» գոլառատ հանդիպում անցկացրին, որն ավարտվեց ոչ-ոքի՝ 2:2 հաշվով։ Ռոբերտ Արզումանյանի գլխավորած թիմը մոտ էր հաղթանակին, սակայն հիմնական ժամանակի ավարտից մի քանի րոպե առաջ բաց թողեց հավասարեցնող գոլը։

Հանդիպման հաշիվը բացեցին հյուրերը։ Արդեն 12-րդ րոպեին Արման Ասլանյանը առաջ մղեց «Արարատին»՝ խփելով իր առաջին գոլը Հայաստանի առաջնության ընթացիկ մրցաշրջանում։

Սակայն «Ուրարտուին» հաջողվեց վերականգնել հավասարակշռությունը դեռ առաջին խաղակեսում։ 35-րդ րոպեին ճապոնացի կիսապաշտպան Կացույուկի Իշիբաշին գրավեց մրցակցի դարպասը՝ խփելով իր երկրորդ գոլը Պրեմիեր լիգայի ընթացիկ մրցաշրջանում։

Երկրորդ խաղակեսում թիմերը շարունակեցին պայքարը հաղթանակի համար, իսկ հանդիպման ամենատպավորիչ դրվագներից մեկը տեղի ունեցավ 79-րդ րոպեին։ Գոռ Լալուքյանը գեղեցիկ հարվածով գրավեց իր նախկին թիմի դարպասը՝ «Ուրարտուին» առաջ մղելով հաշվի մեջ՝ 2:1։

Թվում էր՝ տանտերերին կհաջողվի պահպանել առավելությունն ու վաստակել երեք միավոր, սակայն «Արարատը» չէր պատրաստվում հանձնվել։ 87-րդ րոպեին Սինդու Ժունիոր Բակայոկոն խփեց պատասխան գոլը և փրկեց հյուրերին պարտությունից՝ հաստատելով վերջնական հաշիվը՝ 2:2։

Այսպիսով, «Ուրարտուն» հանդիպման վերջնամասում ձեռքից բաց թողեց կարևոր հաղթանակը։ Ռոբերտ Արզումանյանի թիմը վաստակել է 12 միավոր և զբաղեցնում է հինգերորդ տեղը Հայաստանի առաջնության մրցաշարային աղյուսակում։

«Արարատը», որը Բակայոկոյի ուշ գոլի շնորհիվ խուսափեց պարտությունից, ունի 10 միավոր և գտնվում է ութերորդ հորիզոնականում։

Հայաստանի առաջնություն, 9-րդ տուր

«Ուրարտու» — «Արարատ»՝ 2:2

Գոլեր՝ Իշիբաշի (35), Լալուքյան (79) — Ասլանյան (12), Բակայոկո (87)։