Սկանդալ Բելգիա — Սենեգալ խաղում. Archivo VAR-ը 120-րդ րոպեին նշանակված 11-մետրանոցը սխալ է համարել

Բելգիայի հավաքականի հաղթանակը Սենեգալի նկատմամբ 2026 թվականի աշխարհի առաջնության փլեյ-օֆֆում սկանդալային շարունակություն ստացավ։ Վճռորոշ 11-մետրանոցը 120+5-րդ րոպեին, որն իրացրեց Յուրի Տիլեմանսը, կոշտ քննադատության արժանացավ Archivo VAR նախագծի կողմից։

Բելգիան անհավանական կամբեք կատարեց Սենեգալի դեմ խաղում և լրացուցիչ ժամանակում հաղթեց 3:2 հաշվով, սակայն հանդիպման առանցքային դրվագը լուրջ քննարկումների առարկա դարձավ։

Խոսքը վերաբերում է օվերթայմի վերջնամասում նշանակված 11-մետրանոցին։ Հենց այդ հարվածն իրացրեց Բելգիայի հավաքականի ավագ Յուրի Տիլեմանսը՝ խփելով հաղթական գոլը և իր թիմին դուրս բերելով 2026 թվականի աշխարհի առաջնության 1/8 եզրափակիչ։

Սակայն Archivo VAR-ի կարծիքով՝ մրցավարների որոշումը սխալ էր, իսկ VAR-ի միջամտությունը՝ չափազանցված։

Archivo VAR. «Սա 11-մետրանոց չէ»

Վիճահարույց դրվագի վերլուծության մեջ Archivo VAR-ը նշել է, որ Տիլեմանսն ինքն է ոտքը դրել Սենեգալի ֆուտբոլիստ Լամին Կամարայի շարժման ուղղությամբ, ինչից հետո տեղի է ունեցել կոնտակտ։

Նախագծի վարկածով՝ բելգիացի կիսապաշտպանն ամբողջությամբ ինքն է նախաձեռնել այդ բախումը, ուստի այդ դրվագը չպետք է հանգեցներ 11-մետրանոցի նշանակման։

«Տիլեմանսը ոտքը դնում է Կամարայի շարժման առաջ, ինչի հետևանքով կոնտակտ է տեղի ունենում։ Սա 11-մետրանոց չէ», — նշված է Archivo VAR-ի գնահատականում։

Նշվում է նաև, որ եթե գլխավոր մրցավարն ի սկզբանե չնշանակեր 11-մետրանոց, այդ որոշումը չէր դիտվի որպես ակնհայտ և հստակ սխալ։ Հետևաբար՝ VAR-ը բավարար հիմքեր չուներ միջամտելու համար։

VAR-ի չափազանցված միջամտությո՞ւն

Archivo VAR-ի գլխավոր դժգոհությունը վերաբերում է ոչ միայն բուն որոշմանը, այլև այն հանգամանքին, որ տեսաօգնականները, իրենց կարծիքով, չափազանց ակտիվ են միջամտել դրվագին։

Քննադատները կարծում են, որ պահը չէր համապատասխանում «ակնհայտ և հստակ սխալի» չափանիշին, որը պետք է առանցքային լինի VAR-ի միջամտության համար։ Կոնտակտ իսկապես եղել է, սակայն Archivo VAR-ի կարծիքով՝ այն հրահրել է հենց Տիլեմանսը։

Արդյունքում վիճահարույց 11-մետրանոցը դարձավ հանդիպման վճռորոշ պահը։ Բելգիան հաղթեց Սենեգալին 3:2 հաշվով, թեև դեռ 86-րդ րոպեին զիջում էր 0:2։

Սակայն ավելացնենք, որ ինքնին խախտումը 11-մետրանոցի էր ձգում։

Բելգիան անցավ հաջորդ փուլ, Սենեգալը դուրս մնաց վիճահարույց որոշումից հետո

Յուրի Տիլեմանսի իրացրած 11-մետրանոցից հետո Բելգիան ձևակերպեց 2026 թվականի աշխարհի առաջնության ամենադրամատիկ կամբեքներից մեկը և դուրս եկավ մրցաշարի 1/8 եզրափակիչ։

Սենեգալը, որը հաղթանակից ընդամենը մի քանի րոպե էր հեռու, լքեց մրցաշարը մի խաղից հետո, որի վճռորոշ դրվագը դեռ երկար կքննարկեն երկրպագուներն ու փորձագետները։