Հայաստանի հունահռոմեական ըմբշամարտի հավաքականը մեկնել է Ուզբեկստան

Հայկական պատվիրակությանը ջերմորեն են դիմավորել Տաշքենդում։ Թիմին ընդունել է Ուզբեկստանի հունահռոմեական ըմբշամարտի հավաքականի գլխավոր մարզիչ Ռուստամ Ասակալովը։

Ասակալովը բարձր է գնահատել Ուզբեկստան ժամանած թիմի մակարդակը՝ առանձնահատուկ ընդգծելով, որ Հայաստանի հավաքականը գլխավորում է 2025 թվականի Եվրոպայի լավագույն մարզիչ ճանաչված Արմեն Բաբալարյանը։

Ուսումնամարզական հավաքին մասնակցում են ինչպես Հայաստանի Մ23 երիտասարդական հավաքականի ներկայացուցիչները, այնպես էլ մեծահասակների ազգային հավաքականի որոշ անդամներ։

Երիտասարդ ըմբիշները պատրաստվում են Մ23 աշխարհի առաջնությանը, որը կանցկացվի Լաս Վեգասում հոկտեմբերի 12-ից 18-ը։ Մեծահասակների հավաքականի ներկայացուցիչները շարունակում են նախապատրաստվել 2026 թվականի աշխարհի առաջնությանը, որը նախատեսված է անցկացնել հոկտեմբերի 24-ից նոյեմբերի 1-ը Աստանայում։

Ուսումնամարզական հավաքից հրապարակված կադրերում կարելի է նկատել Հայաստանի մեծահասակների հավաքականի անդամներ Սլավիկ Գալստյանին և Գասպար Տերտերյանին։ Նրանց հետ Տաշքենդում մարզվում են նաև Մ23 հավաքականի ներկայացուցիչներ Սամվել Տերտերյանը, Արամայիս Հարությունյանը և այլ հայ ըմբիշներ։

Ուզբեկստանում անցկացվող համատեղ հավաքը կդառնա աշնան գլխավոր միջազգային մրցաշարերին հայ մարզիկների նախապատրաստության կարևոր փուլերից մեկը։