Սաշա Զդյելարը դարձավ «Նոայի» ֆուտբոլիստ և Հայաստանի առաջնության ամենաթանկարժեք խաղացողը

Հայկական «Նոա» ֆուտբոլային ակումբը պաշտոնապես հայտարարել է սերբ կիսապաշտպան Սաշա Զդյելարի հետ պայմանագիր կնքելու մասին։

31-ամյա ֆուտբոլիստը բարձր մակարդակում հանդես գալու մեծ փորձ ունի։ Իր կարիերայի ընթացքում Զդյելարը պաշտպանել է իսպանական «Մալյորկայի», Բելգրադի «Պարտիզանի», Մոսկվայի ԲԿՄԱ-ի և Սանկտ Պետերբուրգի «Զենիթի» գույները։

«Պարտիզանի» կազմում սերբ կիսապաշտպանը երկու անգամ դարձել է Սերբիայի գավաթակիր, իսկ ԲԿՄԱ-ի հետ երկու անգամ նվաճել է Ռուսաստանի գավաթը։

Զդյելարը հաջողությունների է հասել նաև միջազգային մակարդակում։ 2015 թվականին նա Սերբիայի Մ20 հավաքականի կազմում դարձել է աշխարհի չեմպիոն։ Սերբիայի ազգային հավաքականի կազմում կիսապաշտպանն անցկացրել է 9 հանդիպում։

Զդյելարի հիմնական դիրքը հենակետային կիսապաշտպանն է։ 183 սմ հասակ ունեցող սերբ ֆուտբոլիստն աչքի է ընկնում գնդակի խլման հմտությամբ, գնդակի լավ վերահսկմամբ, ինչպես նաև կարճ և միջին փոխանցումներով թիմի գրոհները սկսելու ունակությամբ։

2 միլիոն եվրո գնահատվող տրանսֆերային արժեքով Զդյելարը կդառնա Հայաստանի առաջնության ամենաթանկարժեք ֆուտբոլիստը։ Նրան հաջորդում է «Նոայի» մեկ այլ սերբ ֆուտբոլիստ՝ հարձակվող Մարկո Լազետիչը, որի տրանսֆերային արժեքը գնահատվում է 1 միլիոն եվրո։

Փորձառու սերբ կիսապաշտպանի ձեռքբերումը «Նոայի» կազմի հերթական ուժեղացումն է։ Ակումբը շարունակում է համալրել թիմը Հայաստանի առաջնությունում և միջազգային մրցասպարեզում հաջող ելույթների համար։