«Նոան» ութ գոլ խփեց «Արարատին» և պահպանեց չեմպիոնական պայքարի ինտրիգը

«Նոան» խոշոր հաղթանակ տարավ «Արարատի» նկատմամբ Հայաստանի Պրեմիեր լիգայի 26-րդ տուրի խաղում։ Սանդրո Պերկովիչի թիմը 8:3 հաշվով ջախջախեց մրցակցին և շարունակում է պայքարը չեմպիոնական տիտղոսի համար։

Հանդիպման գլխավոր հերոսները դարձան Մատեուշ Այյաշն ու Մարին Յակոլիշը, որոնք ձևակերպեցին դուբլ։ «Նոայի» կազմում մեկական գոլով աչքի ընկան նաև Էլդեր Ֆերեյրան, Նատանիել Սանտինին, Նարդին Մուլահուսեյնովիչը և Իմրան Ուլադ Օմարը։

«Նոայի» համար այս արդյունքը դարձավ տպավորիչ գոլային շարքի շարունակություն։ Վերջին չորս խաղերում թիմն արդեն խփել է 20 գոլ։ Համեմատության համար՝ սա երեք գոլով ավելի է, քան «Շիրակը» խփել է Հայաստանի ընթացիկ առաջնության ամբողջ մրցաշրջանի ընթացքում։

«Արարատը» կարողացավ պատասխանել երեք գոլով, սակայն դրանք միայն կրճատեցին հաշվի տարբերությունը։ Թիմի կազմում աչքի ընկան Դումբիան, Ուատարան և Լուլուկյանը։ Չնայած հարձակման արդյունավետությանը՝ «Արարատի» պաշտպանությունը կրկին չկարողացավ դիմանալ մրցակցի ճնշմանը, իսկ պարտությունը թիմին թողեց մրցաշարային աղյուսակի վերջին հորիզոնականում։

Այս հաղթանակից հետո «Նոան» պահպանեց չեմպիոն դառնալու հնարավորությունները։ Թիմին առջևում սպասում են երկու առանցքային հանդիպումներ՝ հետաձգված խաղը «Փյունիկի» դեմ և վերջին տուրի հանդիպումը «Ուրարտուի» հետ։ Եթե Սանդրո Պերկովիչի թիմը հաղթի երկու խաղերում, իսկ առաջատար «Արարատ-Արմենիան» միավորներ կորցնի «Գանձասարի» դեմ խաղում, Հայաստանի չեմպիոն կդառնա հենց «Նոան»։

Հակառակ դեպքում առավելությունը կմնա «Արարատ-Արմենիայի» կողմում, որը մրցաշրջանի ավարտից առաջ ավելի շահեկան դիրքում է։

«Արարատի» համար իրավիճակը շարունակում է մնալ չափազանց ծանր։ Թիմը վտանգի տակ է առաջին անգամ իր պատմության մեջ դուրս մնալու Առաջին լիգա։ Ակումբի ճակատագիրը կորոշվի վերջին տուրում ԲԿՄԱ-ի դեմ խաղում, իսկ «Շիրակը», որն ունի մեկ միավորի առավելություն, կմրցի «Ալաշկերտի» հետ։