«Լեխիան» մոտ 1 մլն եվրո կվճարի Արթուր Սերոբյանի համար․ ֆուտբոլիստը թիմին կմիանա փետրվարին

«Արարատ-Արմենիան» և լեհական «Լեխիա Գդանսկը» համաձայնության են հասել Հայաստանի ազգային հավաքականի վինգեր Արթուր Սերոբյանի տրանսֆերի շուրջ։

Առկա տեղեկությունների համաձայն՝ գործարքի արժեքը կկազմի մոտ 1 միլիոն եվրո։ Լեհական ակումբն արդեն ձեռք է բերել 23-ամյա ֆուտբոլիստի տրանսֆերային իրավունքները, սակայն կողմերը պայմանավորվել են, որ Սերոբյանը մինչև 2027 թվականի հունվարի վերջը կշարունակի հանդես գալ «Արարատ-Արմենիայի» կազմում։

Այսպիսով, հայ ֆուտբոլիստը պաշտոնապես «Լեխիային» կմիանա 2027 թվականի փետրվարի 1-ին։

Նախորդ մրցաշրջանում Սերոբյանը «Արարատ-Արմենիայի» կազմում դարձավ Հայաստանի չեմպիոն, իսկ մրցաշրջանի արդյունքներով ճանաչվեց առաջնության լավագույն ֆուտբոլիստ։

2026/27 մրցաշրջանում Արթուրն արդեն հասցրել է անցկացնել 8 հանդիպում եվրագավաթներում և 5 հանդիպում Հայաստանի առաջնությունում։ Նրա հաշվին կա մեկ գոլ և մեկ գոլային փոխանցում։

Սերոբյանի գնահատված շուկայական արժեքը կազմում է 500 հազար եվրո, մինչդեռ լեհական ակումբ տեղափոխության գումարը, առկա տեղեկությունների համաձայն, մոտ երկու անգամ ավելի բարձր է։

23 տարեկանում վինգերն արդեն անցկացրել է 28 հանդիպում Հայաստանի ազգային հավաքականի կազմում և դարձել մեկ գոլի հեղինակ։

Սերոբյանի համար սա արտերկրում հանդես գալու առաջին փորձը չի լինի։ Նախկինում ֆուտբոլիստը վարձավճարով հանդես է եկել մոլդովական «Շերիֆում» և պորտուգալական «Կասա Պիայում»։

Նշենք, որ վերջերս «Լեխիա Գդանսկ» է տեղափոխվել նաև Հայաստանի հավաքականի մեկ այլ վինգեր՝ Նարեկ Հովհաննիսյանը։ Այսպիսով, 2027 թվականի փետրվարից լեհական ակումբի կազմում հանդես կգան միանգամից երկու հայ ֆուտբոլիստներ։