Ստեփան Սարգսյանի գավաթ 2026․ առաջին հինգ քաշային կարգերի հաղթողները

Սեպտեմբերի 12-ին Երևանում կայացավ ազատ ոճի ըմբշամարտի միջազգային «Ստեփան Սարգսյանի գավաթ 2026» մրցաշարի եզրափակիչ գոտեմարտերի առաջին հատվածը։ Մրցաշարն անցկացվում է Հայաստանի մայրաքաղաքում սեպտեմբերի 10-ից 13-ը։

Առաջին հինգ քաշային կարգերի եզրափակիչների արդյունքներով Հայաստանի հավաքականը նվաճեց երեք մեդալ՝ մեկ ոսկե և երկու բրոնզե։

Գլխավոր հաջողությանը հասավ Մանվել Խնձրցյանը, որը հաղթող դարձավ մինչև 57 կգ քաշային կարգում։ Եզրափակիչ գոտեմարտում հայ ըմբիշը 8։6 հաշվով հաղթեց Բելառուսի ներկայացուցիչ Արիան Տյուտրինին և նվաճեց տնային մրցաշարի ոսկե մեդալը։

Հայաստանի հավաքականին ևս երկու մեդալ պարգևեցին Նարեկ Հարությունյանը և Ռազմիկ Եփրեմյանը։

Մինչև 74 կգ քաշային կարգի բրոնզե մեդալի համար գոտեմարտում Հարությունյանը վստահ հաղթանակ տարավ լեհ Կամիլ Ռիբիցկիի նկատմամբ՝ 8։0 հաշվով՝ վաղաժամ ավարտելով հանդիպումը։

Մինչև 86 կգ քաշային կարգում Ռազմիկ Եփրեմյանը 6։2 հաշվով առավելության հասավ Ղազախստանի ներկայացուցիչ Մագժան Ժանիրբայի նկատմամբ։

Մեդալներին մոտ էին նաև Հայաստանի մյուս ներկայացուցիչները։ Մինչև 65 կգ քաշային կարգում Արեն Հայրապետյանը բրոնզե մեդալի համար պայքարում 4։8 հաշվով զիջեց ղազախ Ադիլ Օսպանովին։ Մինչև 97 կգ քաշային կարգում Մարտին Սիմոնյանը 0։5 հաշվով պարտվեց բելառուս Ալեքսանդր Գուշտինին, իսկ Գուրգեն Սիմոնյանը լարված գոտեմարտում 4։6 հաշվով զիջեց Ռուսաստանի ներկայացուցիչ Շամիլ Տամբիևին։

Սեպտեմբերի 12-ի եզրափակիչների արդյունքները

57 կգ

Եզրափակիչ․ Մանվել Խնձրցյան (Հայաստան) — Արիան Տյուտրին (Բելառուս) — 8։6

Բրոնզե մեդալի համար․
Իոն Բուլգարու (Մոլդովա) — Լուկա Գվինջիլիա (Վրաստան) — 4։5
Դիմչիկ Բատոմունկուև (Բելառուս) — Ամիր Չամզին (Ռուսաստան) — 8։6

65 կգ

Եզրափակիչ․ Աբասգաջի Մագոմեդով (Ռուսաստան) — Օսիմժան Դաստանբեկ (Ղազախստան) — 10։0

Բրոնզե մեդալի համար․
Ադիլ Օսպանով (Ղազախստան) — Արեն Հայրապետյան (Հայաստան) — 8։4
Ջոն Մաքքենա (ԱՄՆ) — Ռիֆատ Սայբոտալով (Ղազախստան) — 10։1

74 կգ

Եզրափակիչ․ Իմամ Գանիշով (Ռուսաստան) — Քեմերոն Ամին (ԱՄՆ) — 3։1

Բրոնզե մեդալի համար․
Կամիլ Ռիբիցկի (Լեհաստան) — Նարեկ Հարությունյան (Հայաստան) — 0։8
Դարխան Եսենգալի (Ղազախստան) — Մուրադ Ձակուպով (Ղազախստան) — 2։1

86 կգ

Եզրափակիչ․ Ասխաբ Խաջիև (Ղազախստան) — Զահիդ Վալենսիա (ԱՄՆ) — 12։11

Բրոնզե մեդալի համար․
Մագժան Ժանիրբայ (Ղազախստան) — Ռազմիկ Եփրեմյան (Հայաստան) — 2։6
Ռուստեմ Միրզագալիև (Ղազախստան) — Ալան Տիգիև (Բուլղարիա) — 10։7

97 կգ

Եզրափակիչ․ Կոնստանտին Պետրիաշվիլի (Վրաստան) — Վլադիսլավ Կոզլով (Բելառուս) — 10։0

Բրոնզե մեդալի համար․
Ալեքսանդր Գուշտին (Բելառուս) — Մարտին Սիմոնյան (Հայաստան) — 5։0
Գուրգեն Սիմոնյան (Հայաստան) — Շամիլ Տամբիև (Ռուսաստան) — 4։6

Այսպիսով, առաջին հինգ քաշային կարգերի հաղթողներ դարձան Մանվել Խնձրցյանը (Հայաստան), Աբասգաջի Մագոմեդովը (Ռուսաստան), Իմամ Գանիշովը (Ռուսաստան), Ասխաբ Խաջիևը (Ղազախստան) և Կոնստանտին Պետրիաշվիլին (Վրաստան)։

Սեպտեմբերի 13-ին Հայաստանի հավաքականը ևս երկու հնարավորություն կունենա ոսկե մեդալներով համալրելու իր մեդալային հավաքածուն։ Մինչև 61 կգ քաշային կարգի եզրափակիչում Սարգիս Բեգոյանը կմրցի Ղազախստանի ներկայացուցիչ Մայրամբեկ Կարտբայի հետ, իսկ մինչև 70 կգ քաշային կարգում Վազգեն Թևանյանը ոսկե մեդալի համար կպայքարի Ռուսաստանի ներկայացուցիչ Իբրահիմ Իբրահիմովի հետ։

Սեպտեմբերի 13-ի եզրափակիչ զույգերը

61 կգ․ Մայրամբեկ Կարտբայ (Ղազախստան) — Սարգիս Բեգոյան (Հայաստան)
70 կգ․ Իբրահիմ Իբրահիմով (Ռուսաստան) — Վազգեն Թևանյան (Հայաստան)
79 կգ․ Հաջիմուրադ Ալիխմաև (Ռուսաստան) — Այզեկ Օլեյնիկ (ԱՄՆ)
92 կգ․ Մագոմեդ Ռամազանով (Բուլղարիա) — Ամանուլա Գաջիմագոմեդով (Ռուսաստան)
125 կգ․ Մերաբ Սուլեյմանիշվիլի (Վրաստան) — Մոհսեր Սիյար (Գերմանիա)

«Ստեփան Սարգսյանի գավաթի» այս տարվա խաղարկությանը մասնակցում է 181 մարզիկ 15 երկրից։ Հայաստանը ներկայացված է երկրի գրեթե բոլոր ուժեղագույն ըմբիշներով։ Խնձրցյանի և Թևանյանի հետ միասին մրցաշարին մասնակցում են նաև Արման Անդրեասյանը, Խաչատուր Խաչատրյանը և ազգային հավաքականի այլ ներկայացուցիչներ։

Երևան են ժամանել նաև մի շարք տիտղոսակիր արտասահմանցի մարզիկներ, այդ թվում՝ աշխարհի չեմպիոն Զահիդ Վալենսիան ԱՄՆ-ից, աշխարհի և Եվրոպայի չեմպիոն Աբասգաջի Մագոմեդովը Ռուսաստանից և Եվրոպայի չեմպիոն Իբրահիմ Իբրահիմովը։

Հայաստանի կառավարությունը երկրի Ըմբշամարտի ֆեդերացիային հատկացրել է ավելի քան 25 միլիոն դրամ՝ մրցաշարի կազմակերպման և անցկացման համար։

Նախատեսված են նաև դրամական պարգևներ․ յուրաքանչյուր քաշային կարգի հաղթող կստանա 2000 ԱՄՆ դոլար, արծաթե մեդալակիրները՝ 1000-ական դոլար, իսկ բրոնզե մեդալակիրները՝ 500-ական դոլար։

Ստեփան Սարգսյանի գավաթի եզրափակիչ գոտեմարտերի երկրորդ հատվածը կկայանա սեպտեմբերի 13-ին և կմեկնարկի ժամը 13։00-ին։

ՈՒՂԻՂ ՀԵՌԱՐՁԱԿՈՒՄԸ ԿԼԻՆԻ ԱՅՍՏԵՂ