Էնդրյու Դարաքչյանը գեղեցիկ հաղթական գոլ է խփել ԱՄՆ-ի համալսարանական առաջնությունում (ՏԵՍԱՆՅՈՒԹ)

Հայ ֆուտբոլիստը՝ Էնդրյու Դարաքչյանը, գեղեցիկ հաղթական գոլի հեղինակ է դարձել ԱՄՆ-ի համալսարանական ֆուտբոլի առաջնության (NCAA) խաղում, որում նրա «Միչիգան Սթեյթ» (Michigan State) թիմը 2:1 հաշվով հաղթել է «Մերիլենդին» (Maryland)։

Ազգային վարկանիշային աղյուսակում 19-րդ տեղը զբաղեցնող «Միչիգան Սթեյթը» կարողացել է հաղթել մրցաշրջանի ուժեղագույն մրցակիցներից մեկին՝ 7-րդ հորիզոնականում գտնվող «Մերիլենդին»։ Այս հաղթանակը հատկապես նշանակալի էր թիմի համար, քանի որ «Միչիգան Սթեյթը» 2018 թվականից ի վեր առաջին անգամ է հաղթել «Մերիլենդին»։

Հանդիպման գլխավոր հերոսը դարձել է Էնդրյու Դարաքչյանը, որը խփել է իր թիմի երկրորդ և, ինչպես պարզվել է, հաղթական գոլը։ Հայ ֆուտբոլիստը ցուցադրել է հիանալի տեխնիկա՝ կատարելով բարդ հարված օդից և գնդակն ուղարկելով մրցակցի դարպասը։

Դարաքչյանի համար սա հինգերորդ գոլն էր NCAA-ի ընթացիկ մրցաշրջանի տասը խաղում։ Հայ ֆուտբոլիստը շարունակում է բարձր արդյունավետություն ցուցադրել ԱՄՆ-ի ուսանողական ֆուտբոլում։

Նշենք, որ Դարաքչյանը նախկինում հանդես է եկել Հայաստանի Մ19 հավաքականում, որի կազմում անցկացրել է չորս հանդիպում և խփել մեկ գոլ։ Բացի այդ, 2024 թվականին ֆուտբոլիստը հրավիրվել է Հայաստանի երիտասարդական՝ Մ21 հավաքականի ուսումնամարզական հավաքին։

NCAA-ում հաջող ելույթները կարող են կրկին գրավել Հայաստանի երիտասարդական հավաքականի մարզչական շտաբի ուշադրությունը։

Էնդրյու Դարաքչյանի հաղթական գոլի տեսանյութը