Էդգար Նավասարդյանը դուբլի հեղինակ դարձավ և հաղթանակ պարգևեց «Էստերսունդին» Շվեդիայի առաջնությունում

Հայ հարձակվող Էդգար Նավասարդյանը դարձավ Շվեդիայի Սուպերէտտանի 7-րդ տուրի հանդիպման գլխավոր հերոսներից մեկը։ 21-ամյա ֆուտբոլիստը փոխարինման դուրս եկավ և օգնեց «Էստերսունդին» կարևոր հաղթանակ տանել «Բրագեի» նկատմամբ՝ 4:2 հաշվով։

Նավասարդյանը խաղադաշտ դուրս եկավ 75-րդ րոպեին, երբ հանդիպման հաշիվը հավասար էր՝ 2:2։ Թվում էր՝ խաղը կարող է ավարտվել ոչ-ոքի, սակայն վերջնամասում իր խոսքն ասաց հայ ֆուտբոլիստը։

84-րդ րոպեին Էդգարը առաջ մղեց «Էստերսունդին», իսկ արդեն ավելացված ժամանակում՝ 90+5-րդ րոպեին, ձևակերպեց դուբլ և վերջնականապես վճռեց հանդիպման ելքը։

Նավասարդյանի համար այս գոլերը դարձան առաջինը Սուպերէտտանի ընթացիկ մրցաշրջանում։ Փոխարինման հաջող դուրս գալը կարող է կարևոր պահ դառնալ հարձակվողի համար՝ հիմնական կազմում տեղ զբաղեցնելու և ավելի շատ խաղաժամանակ ստանալու պայքարում։

Այս հաղթանակից հետո «Էստերսունդը» վաստակեց 11 միավոր և զբաղեցնում է մրցաշարային աղյուսակի 5-րդ հորիզոնականը։ Թիմը շարունակում է պայքարել բարձր տեղերի և Շվեդիայի բարձրագույն լիգա դուրս գալու համար։

Նշենք, որ Սուպերէտտանում հանդես է գալիս նաև ևս մեկ հայ հարձակվող՝ Ալբերտ Ալեքսանյանը։ Նա պաշտպանում է «Նորչեպինգի» գույները, որը 7 տուրից հետո զբաղեցնում է 8-րդ տեղը։ Ալեքսանյանի հաշվին ընթացիկ մրցաշրջանում կա 1 գոլ 7 խաղում։