Բաբալարյանը վստահ է․ Արթուր Ալեքսանյանը կարիերան չի ավարտում

2025թ. Խորվաթիայի մայրաքաղաք Զագրեբում կայացած հունահռոմեական ըմբշամարտի աշխարհի առաջնությունում աշխարհի 4-ակի, Եվրոպայի 7-ակի և օլիմպիական չեմպիոն Արթուր Ալեքսանյանը չկարողացավ դուրս գալ կիսաեզրափակիչ՝ 1/4 եզրափակչում պարտվելով ադրբեջանցի ըմբիշ Մուրադ Ահմադիևին։

Հայաստանի հավաքականի գլխավոր մարզիչ Արմեն Բաբալարյանը մեկնաբանեց թիմի 33-ամյա առաջնորդի ելույթը։

«Տարիքը այստեղ կապ չունի։ Արթուրը հիանալի մարզավիճակում էր, ամբողջությամբ ապաքինվել էր վնասվածքներից։ Երբեմն լինում են դրվագներ, երբ մի պահը որոշում է գոտեմարտի ելքը։ Արթուրի ձեռքը սայթաքեց, և նա հայտնվեց անհարմար իրավիճակում։ Դա սովորական երևույթ է անգամ մեծագույն մարզիկների համար։ Հիշեք Լոպեսին, ով հաջողությամբ հանդես եկավ մինչև 42 տարեկանը», — նշեց մարզիչը։

Մարզիչը կոչ արեց երկրպագուներին հարգանքով վերաբերվել բազմակի տիտղոսակիր ըմբիշին։

«Տեսնում եմ, որ նրան հաճախ են քննադատում։ Բայց 2009-ից Արթուրը մեզ ուրախացնում է իր հաղթանակներով և արդեն 16 տարի անընդմեջ մեդալ է բերում Հայաստանին։ Եթե նրա բոլոր մեդալները կախել մեկ մարդու վրա, նա հազիվ թե կարողանա կանգուն մնալ։ Այժմ չստացվեց, բայց պարտությունները բոլորի մոտ էլ լինում են»։

Բաբալարյանը նաև ընդգծեց, որ պետք է ուշադրություն դարձնել նաև հավաքականի մյուս մարզիկներին։

«Վերցնենք Սլավիկ Գալստյանին․ Օլիմպիական խաղերից հետո նա ծանր տարավ անարդար դատավորությունը, ստիպված էր նույնիսկ հոգեբանի հետ աշխատել։ Բայց հաղթահարեց և վերադարձավ՝ նվաճելով աշխարհի առաջնության բրոնզե մեդալը։ Այստեղ օգնեց նաև թիմը և Մալխաս Ամոյանը, ով միշտ աջակցում է տղաներին»։

Ամփոփելով՝ մարզիչը վստահություն հայտնեց, որ թիմի առաջնորդը շարունակելու է կարիերան․

«Ոչինչ ճակատագրական չի պատահել։ Սա ընդամենը անհաջող դրվագ էր Արթուրի փայլուն կարիերայում։ Կարծում եմ՝ նա դեռ կշարունակի հանդես գալ և նոր հաղթանակներ կպարգևի մեզ»։