Հարությունյանն օգնեց «Պուշկաշ Ակադեմիային» հաղթել և շարունակում է մեկնարկային կազմում հանդիպումների շարքը

Հայաստանի ազգային հավաքականի պաշտպան Գեորգի Հարությունյանը շարունակում է կայուն խաղային պրակտիկա ստանալ հունգարական «Պուշկաշ Ակադեմիայի» կազմում։

Ֆուտբոլիստը չորրորդ հանդիպումն անընդմեջ դուրս եկավ թիմի մեկնարկային կազմում և կրկին խաղադաշտում անցկացրեց ամբողջ 90 րոպեն։ Հունգարիայի առաջնության 32-րդ տուրի՝ «Զալաեգերսեգի» դեմ խաղում Հարությունյանը հանդես եկավ աջ կենտրոնական պաշտպանի դիրքում՝ երեք պաշտպանով սխեմայում։

«Պուշկաշ Ակադեմիան» հաղթեց 3:1 հաշվով, իսկ հայ պաշտպանը աչքի ընկավ օգտակար գործողություններով թե՛ պաշտպանությունում, թե՛ հարձակման մեջ։ Հարությունյանի հաշվին գրանցվեց մեկ առանցքային փոխանցում, մեկ ստեղծած գոլային պահ և մեկ գնդակի խլում։

Մրցաշրջանի ավարտից մեկ տուր առաջ «Պուշկաշ Ակադեմիան» զբաղեցնում է մրցաշարային աղյուսակի 6-րդ հորիզոնականը և պահպանում է միայն տեսական շանսեր եվրագավաթների ուղեգիր նվաճելու համար։ Դրա համար թիմին անհրաժեշտ է հաղթել վերջին տուրում, ինչպես նաև հույս ունենալ «Ֆերենցվարոշի» հաղթանակին Հունգարիայի գավաթում և «Զալաեգերսեգի» ու «Պակշի» պարտություններին իրենց հանդիպումներում։