Արթուր Միրանյանը նորամուտն է նշել «Իրոնի Տիբերիասի» կազմում Իսրայելի առաջնությունում

Հայաստանի ազգային հավաքականի հարձակվող Արթուր Միրանյանն առաջին հանդիպումն է անցկացրել իսրայելական «Իրոնի Տիբերիասի» կազմում։

Հայ ֆուտբոլիստը նորամուտն է նշել Իսրայելի առաջնության 4-րդ տուրի՝ «Հապոել Երուսաղեմի» դեմ խաղում։ Միրանյանը փոխարինման է դուրս եկել 76-րդ րոպեին, իսկ հանդիպումն ավարտվել է արդյունավետ ոչ-ոքիով՝ 2:2։

Չորս տուրից հետո «Իրոնի Տիբերիասը» տարել է երկու հաղթանակ, մեկ անգամ ոչ-ոքի խաղացել և կրել մեկ պարտություն։ Այդուհանդերձ, թիմը զբաղեցնում է նախավերջին տեղը՝ ունենալով ընդամենը մեկ միավոր, քանի որ մրցաշրջանի մեկնարկից առաջ ֆեդերացիայի որոշմամբ թիմից հանվել էր վեց միավոր։ Առանց այդ պատժի ակումբը կունենար յոթ միավոր և կզբաղեցներ մրցաշարային աղյուսակի երրորդ հորիզոնականը։

«Իրոնի Տիբերիասը» հաջորդ հանդիպումը կանցկացնի սեպտեմբերի 19-ին՝ «Մաքքաբի Հայֆայի» դեմ։ Այդ խաղը Միրանյանի համար ևս մեկ հնարավորություն կլինի խաղաժամանակ ստանալու և մարզավիճակ հավաքելու Հայաստանի ազգային հավաքականի առաջիկա հանդիպումներից առաջ։

Հիշեցնենք, որ ընթացիկ մրցաշրջանի մեկնարկից առաջ Միրանյանը տեղափոխվել էր «Իրոնի Տիբերիաս» իսրայելական մեկ այլ ակումբից՝ «Բնեյ Սախնինից»։