Հայ ձյուդոիստներն ավարտեցին ելույթները Էկվադորում կայացած պատանեկան աշխարհի առաջնությունում

Հայաստանի հավաքականն ավարտեց ելույթները 2026 թվականի ձյուդոյի պատանեկան աշխարհի առաջնությունում, որն անցկացվում էր Գուայակիլում (Էկվադոր)։ Մրցաշարի արդյունքներով հայ մարզիկները նվաճեցին մեկ արծաթե մեդալ։

Մինչև 50 կգ քաշային կարգում Կարեն Նավասարդյանը հաղթանակ տարավ Ֆրանսիայի ներկայացուցչի նկատմամբ, որից հետո պայքարն ավարտեց 1/8 եզրափակիչում։

Մինչև 55 կգ քաշային կարգում Նարեկ Դավթյանը հասավ եզրափակիչ և դարձավ մրցաշարի արծաթե մեդալակիր։ Եզրափակիչ տանող ճանապարհին նա չորս հաղթանակ տարավ՝ առավելության հասնելով Իտալիայի, Ֆրանսիայի, Ադրբեջանի և Ուկրաինայի ներկայացուցիչների նկատմամբ։

Նարեկ Նահապետյանը (60 կգ) մեկ հաղթանակ տարավ ֆրանսիացի ձյուդոիստի նկատմամբ և պայքարն ավարտեց 1/8 եզրափակիչում։

Մինչև 66 կգ քաշային կարգում Սերգեյ Գևորգյանը և Արտեմ Գալստյանը պայքարից դուրս մնացին առաջին գոտեմարտերից հետո։

Դավիթ Ջուլհակյանը (81 կգ) երկու հաղթանակ տարավ՝ առավելության հասնելով Ալժիրի և Սլովենիայի ներկայացուցիչների նկատմամբ։ Քառորդ եզրափակիչում նա պարտություն կրեց, ապա զիջեց նաև սփոփիչ փուլում։

Այսպիսով, Հայաստանի հավաքականն աշխարհի առաջնությունն ավարտեց մեկ արծաթե մեդալով։

Մեդալային հաշվարկում առաջին տեղը զբաղեցրեց Ռուսաստանի հավաքականը՝ նվաճելով 4 ոսկե, 1 արծաթե և 3 բրոնզե մեդալ։