Սպերցյանն օգնեց «Ալ-Ահլիին» հաղթել Ռոնալդուի «Ալ-Նասրին». հայ կիսապաշտպանի վիճակագրությունը
- Հեղինակ: Vahe Hakobyan
- Sportaran
Սաուդյան Արաբիայի Պրո լիգայի 9-րդ տուրի հետաձգված խաղում «Ալ-Ահլին» կարևոր հաղթանակ տարավ «Ալ-Նասրի» նկատմամբ՝ 3:1 հաշվով։ Հայաստանի ազգային հավաքականի կիսապաշտպան Էդուարդ Սպերցյանը մասնակցեց հանդիպմանը՝ խաղադաշտում անցկացնելով 80 րոպե։
Հաղթող թիմի կազմում գոլերով աչքի ընկան Ռոժեր Իբանյեսը, Գալենոն և Այվան Թոունին։ «Ալ-Նասրի» միակ գոլի հեղինակը պորտուգալացի հարձակվող Կրիշտիանու Ռոնալդուն էր։
Էդուարդ Սպերցյանը «Ալ-Ահլիի» մեկնարկային կազմում էր և ակտիվ մասնակցություն ունեցավ թիմի հարձակողական գործողություններին։ Նրա իրացրած անկյունային հարվածից հետո պաշտպան Ռոժեր Իբանյեսը գրավեց մրցակցի դարպասը։ Սակայն գոլային փոխանցումը չգրանցվեց հայ կիսապաշտպանի անվան դիմաց, քանի որ դրվագում գնդակն անդրադարձել էր այլ ֆուտբոլիստից։
80 րոպեների ընթացքում Սպերցյանը կատարեց երեք առանցքային փոխանցում, հինգից երեք ճշգրիտ եզրային փոխանցում և ցուցադրեց փոխանցումների 90% ճշգրտություն։
Էդուարդ Սպերցյանի վիճակագրությունը «Ալ-Նասրի» դեմ
-
Խաղադաշտում անցկացրած րոպեներ՝ 80
-
Հարվածներ՝ 1 (xG՝ 0,03)
-
Առանցքային փոխանցումներ՝ 3 (xA՝ 0,22)
-
Ճշգրիտ եզրային փոխանցումներ՝ 3/5
-
Ճշգրիտ փոխանցումներ՝ 18 (90%)
-
Վաստակած խախտումներ՝ 3
-
Գնդակի կորուստներ՝ 10
-
Գնդակի վերադարձներ՝ 2
-
Հաղթած մենապայքարներ՝ 5/11
-
Կանոնների խախտումներ՝ 3
-
Դեղին քարտեր՝ 1
-
SofaScore-ի գնահատականը՝ 6,9
Սպերցյանի համար այս հանդիպումը վերադարձ էր խաղադաշտ վնասվածքից հետո, որի պատճառով նա բաց էր թողել Հայաստանի հավաքականի՝ Ազգերի լիգայի նոյեմբերյան հանդիպումները Կիպրոսի և Լատվիայի դեմ։
Այս հաղթանակի շնորհիվ «Ալ-Ահլին» բարձրացավ Սաուդյան Արաբիայի Պրո լիգայի մրցաշարային աղյուսակի չորրորդ հորիզոնական։