«Յունիսպորտը» Չեմպիոնների լիգայում 14:1 հաշվով ջախջախեց իսլանդական «Ռեյկյավիկին»
- Հեղինակ: Vahe Hakobyan
- Sportaran
Հայաստանի ֆուտզալի չեմպիոն «Յունիսպորտը» երկրորդ հաղթանակը տարավ ՈՒԵՖԱ-ի Չեմպիոնների լիգայի նախնական փուլում։
Երևանում օգոստոսի 27-ին կայացած E խմբի երկրորդ խաղում հայկական թիմը 14:1 հաշվով ջախջախեց իսլանդական «Ռեյկյավիկին»։
«Յունիսպորտի» կազմում գոլի հեղինակ դարձան ինը ֆուտբոլիստներ։ Հեթ-տրիկ ձևակերպեց Ռենատո Բամբան, երկուական գոլ խփեցին Գարեգին Մաշումյանը և Համլետ Մանուկյանը։ Մեկական անգամ աչքի ընկան Միհրան Դերմենջյանը, Ռաֆիկ Մելիքյանը, Արթուր Մելքոնյանը, Նարեկ Գալստյանը, Սարգիս Մարգարյանը և Պուտրուս Վասիլևը։ Եվս մեկ գնդակ «Ռեյկյավիկի» ֆուտբոլիստներն ուղարկեցին սեփական դարպասը։
Իսլանդական թիմի միակ գոլը խփեց իսպանացի Ունաի Ֆերնանդեսը։
Հիշեցնենք, որ մրցաշարի մեկնարկային խաղում «Յունիսպորտը» վստահ հաղթանակ տարավ էստոնական «Տալլինի» նկատմամբ՝ 5:1 հաշվով։
E խմբի երկրորդ տուրի մյուս խաղում գերմանական «Վայլիմդորֆը» նույնպես խոշոր հաշվով հաղթանակ տարավ՝ 7:2 հաշվով առավելության հասնելով «Տալլինի» նկատմամբ։ Առաջին տուրում գերմանական թիմը 13:1 հաշվով ջախջախել էր «Ռեյկյավիկին»։
Այսպիսով, խմբում առաջին տեղի ճակատագիրը կորոշվի «Յունիսպորտի» և «Վայլիմդորֆի» միջև առերես հանդիպման ժամանակ։ Խաղը կկայանա օգոստոսի 29-ին։
ՈՒԵՖԱ-ի Չեմպիոնների լիգայի նախնական փուլի E խմբի բոլոր հանդիպումներն անցկացվում են Երևանում։