Հայաստանի մինչև 17 տարեկանների հավաքականը Եվրոպայի առաջնության որակավորման փուլի մեկնարկային խաղում 0։4 հաշվով պարտվեց Ֆրանսիային։ Հանդիպումը կայացավ Երևանում։

Հանդիպման ելքը մեծապես վճռվեց դեռ ընդմիջումից առաջ․ «Մոնակոյի» հարձակվող Էլիես Դիալոն հեթ-տրիկ ձևակերպեց՝ ֆրանսիացիներին ապահովելով երեք գնդակի առավելություն։ Երկրորդ խաղակեսում «Տրուայի» ներկայացուցիչ Յանիս Խարբուշը, իրացնելով 11-մետրանոցը, սահմանեց վերջնական հաշիվը։

Ֆրանսիացիներն ամբողջ հանդիպման ընթացքում տիրում էին նախաձեռնությանը և կատարեցին 26 հարված, որոնցից 14-ը՝ դարպասին։ Մհեր Միրզումյանի սաները հիմնականում պաշտպանվում էին և հազվադեպ էին հասնում մրցակցի դարպասին։

Հայաստանի Մ17 հավաքականը հաջորդ հանդիպումը կանցկացնի նոյեմբերի 14-ին՝ Իտալիայի դեմ։ Իտալացիները որակավորման փուլը սկսել են Լյուքսեմբուրգի նկատմամբ 6։0 հաշվով խոշոր հաղթանակով։

Հայաստանի Մ17 հավաքականի կազմը․ Սարգիս Բարբարյան — Արման Սեխլեյան, Քոլին Մուլինս, Արեն Բաբայան, Ռոբերտ Հովակիմյան (Էդգար Պետրոսյան, 84) — Էրիկ Վուվունիկյան (Գրիգ Մխիթարյան, 75), Գոռ Մկրտչյան — Գրիգոր Հարությունյան, Սամվել Պետրոսյան (Հակոբ Ղարիբյան, 75), Բենյամին Բեգլարյան (Խաչատուր Գևորգյան, 63) — Սամվել Բեգլարյան (Ալեքս Գասպարյան, 75)։