Հայաստանի Մ16 հավաքականը ջախջախեց Ջիբրալթարին և երկրորդ հաղթանակը տարավ Երևանում ընթացող EuroBasket U16-ում
- Հեղինակ: Vahe Hakobyan
- Sportaran
Հայաստանի Մ16 հավաքականը շարունակում է վստահ ելույթները բասկետբոլի Եվրոպայի առաջնության C դիվիզիոնում, որն անցկացվում է Երևանում։ Մրցաշարի երկրորդ խաղում հայկական թիմը խոշոր հաշվով հաղթեց Ջիբրալթարին՝ 109:56։
Հայաստանը առաջին րոպեներից վերցրեց նախաձեռնությունն ու ամբողջությամբ վերահսկեց հանդիպման ընթացքը։ Թիմը ակտիվ օգտագործեց արագ գրոհները, գերազանցեց մրցակցին պայքարում և կրկին աչքի ընկավ բարձր արդյունավետությամբ․ Հայաստանի հավաքականը երկրորդ խաղն անընդմեջ մոտեցավ կամ գերազանցեց 100 միավորի սահմանը։
Հանդիպման ամենաարդյունավետ խաղացողը դարձավ Էնթոնի Սարգսյանը։ Նա ձևակերպեց տպավորիչ դաբլ-դաբլ՝ 22 միավոր, 13 անդրադարձ և 6 փոխանցում։ Սարգսյանը նաև իր ակտիվում գրանցեց 4 խլում և դարձավ խաղի առանցքային բասկետբոլիստներից մեկը։
Հայաստանի հավաքականի կազմում ամենաարդյունավետը Դմիտրի Հաջյանն էր, որը վաստակեց 23 միավոր։ Նա նաև կատարեց 4 փոխանցում և իրացրեց 6 հեռահար նետումներից 3-ը։
Կարևոր ներդրում ունեցան նաև մյուս խաղացողները։ Ալեքսանդր Աբրահամյանը վաստակեց 15 միավոր, Միխայիլ Պետրովը ձևակերպեց դաբլ-դաբլ՝ 13 միավոր և 11 անդրադարձ, իսկ Իթան Կազանջյանը ավելացրեց 10 միավոր։
Հայաստանի հավաքականը հանդիպումն ավարտեց 61 անդրադարձով, 35 փոխանցումով և 31 խլումով, ինչը դարձավ խոշոր հաղթանակի գլխավոր գործոններից մեկը։
Հայաստանի համար սա մրցաշարում երկրորդ հաղթանակն էր։ Առաջին տուրում հայկական թիմը հաղթել էր Անդորրային՝ 98:62 հաշվով։
Հաջորդ հանդիպումը Հայաստանի Մ16 հավաքականը կանցկացնի հուլիսի 8-ին՝ Մալթայի դեմ։