Հայաստանը ջախջախեց Անդորրային Երևանում կայացող EuroBasket U16-ի մեկնարկում
- Հեղինակ: Vahe Hakobyan
- Sportaran
Հայաստանի Մ16 հավաքականը վստահ մեկնարկեց բասկետբոլի Եվրոպայի առաջնության C դիվիզիոնում, որն անցկացվում է Երևանում։ Մրցաշարի առաջին խաղում հայկական թիմը 98:62 հաշվով ջախջախեց Անդորրայի հավաքականին։
Հանդիպման գլխավոր հերոսը Իթան Լեոնարդո Կազանջյանն էր։ ԱՄՆ-ից ժամանած բասկետբոլիստը վաստակեց 30 միավոր՝ խաղից իրացնելով 21 նետումներից 12-ը։ Նա նաև իր վիճակագրությանը ավելացրեց 5 փոխանցում և 3 խլում։
Հայաստանի հավաքականի կազմում ԱՄՆ-ի ևս մեկ ներկայացուցիչ՝ Էնթոնի Սարգսյանը, ձևակերպեց դաբլ-դաբլ՝ 22 միավոր և 11 անդրադարձ։ Նա նաև կատարեց 4 խլում և դարձավ հանդիպման ամենաօգտակար խաղացողներից մեկը։
Զգալի ներդրում ունեցավ նաև Ռուսաստանից Դմիտրի Խաջյանը, որը վաստակեց 12 միավոր և կատարեց 7 արդյունավետ փոխանցում։ Բացի այդ, Հայաստանի հավաքականը ցուցադրեց հիանալի թիմային խաղ․ թիմը կատարեց 33 փոխանցում և ակտիվ գործեց պաշտպանությունում՝ գրանցելով 20 խլում։
Հաղթանակի առանցքային գործոններից մեկը հեռահար նետումներն էին։ Հայաստանը իրացրեց 12 երեքմիավորանոց նետում՝ 44 տոկոս ճշգրտությամբ, ինչը թույլ տվեց արագ ստեղծել հարմար առավելություն և վստահորեն խաղը հասցնել հաղթական ավարտի։
Հաջորդ հանդիպումը Հայաստանի հավաքականը կանցկացնի հուլիսի 5-ին Ջիբրալթարի դեմ։ Եվրոպայի Մ16 առաջնության C դիվիզիոնը Երևանում անցկացվում է հուլիսի 4-ից 12-ը։
Օրվա մյուս խաղերում Մալթան 107:73 հաշվով հաղթեց Մոնակոյին, իսկ Կոսովոն 75:58 հաշվով առավելության հասավ Մոլդովայի նկատմամբ։