«Արարատ-Արմենիան» իմացավ իր մրցակցին Չեմպիոնների լիգայի առաջին փուլում
- Հեղինակ: Vahe Hakobyan
- Sportaran
Հայաստանի չեմպիոն «Արարատ-Արմենիան» իմացավ իր մրցակցին 2026/27 մրցաշրջանի Չեմպիոնների լիգայի որակավորման առաջին փուլում։ Վիճակահանության արդյունքում հայկական ակումբին բաժին հասավ լատվիական «Ռիգան»։
Դիմակայության առաջին հանդիպումը կկայանա Երևանում։ Չեմպիոնների լիգայի որակավորման առաջին փուլի հանդիպումները նախատեսված են հուլիսի 7/8-ին, իսկ պատասխան խաղերը՝ հուլիսի 14/15-ին։
Վիճակահանությունը հեշտ չստացվեց «Արարատ-Արմենիայի» համար։ Հնարավոր մրցակիցների խմբում ընդգրկված էին նաև ակումբներ Ջիբրալթարից, Ուելսից, Հյուսիսային Իռլանդիայից և Էստոնիայից, սակայն Հայաստանի չեմպիոնին բաժին հասավ, հավանաբար, այդ ցուցակի ամենաուժեղ և ամենաթանկ կազմ ունեցող թիմը։ «Ռիգայի» արժեքը գնահատվում է 13,7 միլիոն եվրո, իսկ «Արարատ-Արմենիայինը»՝ 6,5 միլիոն եվրո։
Հնարավոր մրցակիցներն էին՝
«Շեմրոք Ռովերս» — Իռլանդիա
«ԿուՊՍ» — Ֆինլանդիա
«Լինքոլն Ռեդ Իմփս» — Ջիբրալթար
«Ռիգա» — Լատվիա
«Ֆլորա» — Էստոնիա
«Լարն» — Հյուսիսային Իռլանդիա
«Նյու Սեյնթս» — Ուելս
Միևնույն ժամանակ, «Ռիգայի» համար ևս վիճակահանությունը հաջողված անվանել չի կարելի։ «Արարատ-Արմենիան» նույնպես լատվիական ակումբի հնարավոր մրցակիցների թվում ամենալուրջ տարբերակներից մեկն էր։
Նախորդ մրցաշրջանում «Ռիգան» հասել էր Կոնֆերենցիաների լիգայի որակավորման փլեյ-օֆֆ, որտեղ զիջել էր Պրահայի «Սպարտային»։ Լատվիական ակումբը առաջին խաղում պարտվել էր 0։2 հաշվով, սակայն պատասխան հանդիպմանը կարողացել էր հաղթել 1։0 հաշվով՝ լուրջ պայքար մղելով մրցակցի դեմ։
«Արարատ-Արմենիայի» համար սա կլինի առաջին եվրագավաթային արգելքը Հայաստանում չեմպիոնական մրցաշրջանից հետո։ Զույգի հաղթողը պայքարը կշարունակի Չեմպիոնների լիգայի որակավորման հաջորդ փուլում, իսկ պարտվողը կտեղափոխվի Կոնֆերենցիաների լիգայի որակավորման երկրորդ փուլ։
Չեմպիոնների լիգայի 2026/27 մրցաշրջանի որակավորման առաջին փուլի վիճակահանության արդյունքները
- Sabah FC (Ադրբեջան) — The New Saints FC (Ուելս)
- Floriana FC (Մալթա) — Shamrock Rovers FC (Իռլանդիա)
- FC Flora Tallinn (Էստոնիա) — FC Iberia 1999 Tbilisi (Վրաստան)
- Lincoln Red Imps FC (Ջիբրալթար) — Inter Club d’Escaldes (Անդորրա)
- S.S. Tre Fiori F.C. (Սան Մարինո) — Larne FC (Հյուսիսային Իռլանդիա)
- FC Ararat-Armenia (Հայաստան) — Riga FC (Լատվիա)
- FC Vardar (Հյուսիսային Մակեդոնիա) — KuPS Kuopio (Ֆինլանդիա)
- FK Kauno Žalgiris (Լիտվա) — FC Drita (Կոսովո)
- ML Vitebsk (Բելառուս) — Universitatea Craiova (Ռումինիա)
- FC Petrocub (Մոլդովա) — KF Egnatia (Ալբանիա)
- FK Borac (Բոսնիա և Հերցեգովինա) — PFC Levski Sofia (Բուլղարիա)
- Víkingur Reykjavík (Իսլանդիա) — ETO FC Győr (Հունգարիա)
- FC Kairat Almaty (Ղազախստան) — FK Sutjeska Nikšić (Չեռնոգորիա)
- KÍ Klaksvík (Ֆարերյան կղզիներ) — FC Atert Bissen (Լյուքսեմբուրգ)
Այսօր կկայանա նաև Կոնֆերենցիաների լիգայի որակավորման առաջին փուլի վիճակահանությունը, որի ընթացքում իրենց մրցակիցներին կիմանան «Փյունիկը» և «Ալաշկերտը»։ Երկրորդ փուլերի վիճակահանությունը կկայանա հունիսի 17-ին։